Athugið þessi frétt er meira en 6 ára gömul.

Ensk þingkona myrt af þjóðernissinna

16.06.2016 - 14:09
Erlent · Hryðjuverk · Stjórnmál
Mynd með færslu
 Mynd: House of Commons - Twitter
Enska þingkonan Jo Cox lést á spítala nú síðdegis eftir að maður réðst að henni með skotvopni og hnífi á gangstétt í Birstall, skammt frá borginni Leeds. Hún var á leið á fund með kjósendum. Árásarmaðurinn, sem er rúmlega fimmtugur, var yfirbugaður af almennum borgara á vettvangi og er í haldi lögreglu. Sjónarvottar herma að Cox hafi verið skotin þrisvar sinnum og að maðurinn sem yfirbugaði árásarmanninn hafi særst lítillega í átökunum.

Árásarmaðurinn er sagður hafa hrópað slagorðið „Britain first!“ eða „Bretland í fyrsta sæti!“ áður en hann lét til skara skríða. Það er einnig nafn samtaka enskra þjóðernissinna sem berjast gegn áhrifum Islam í Bretlandi. Cox var þingkona breska Verkamannaflokksins, sem berst meðal annars gegn því að Bretari gangi úr Evrópusambandinu. Kosið verður um áframhaldandi aðild Breta 23. júní næstkomandi.

Fjölmargir kollegar Cox á breska þinginu hafa fordæmt árásina og sent fjölskyldu hennar samúðarkveðjur. Þeirra á meðal eru Jeremy Corbyn, formaður Verkamannaflokksins og David Cameron forsætisráðherra. Allri kosningabaráttu, í sambandi við þjóðaratkvæðagreiðsluna um Evrópusambandið, hefur verið aflýst í bili. 

Cox er fyrsti breski þingmaðurinn sem hefur verið ráðinn af dögum frá því árið 1990 þegar írski lýðveldisherinn (IRA) myrti Ian Gow, þingmann Íhaldsflokksins, með bílsprengju sem sprakk fyrir utan heimili hans í Sussex.

Gunnar Hrafn Jónsson
Fréttastofa RÚV
Senda skilaboð

Mest lesið á RÚV