Athugið þessi frétt er meira en 4 ára gömul.

Engin sameiginleg Skripal-rannsókn

04.04.2018 - 21:02
epa06645914 Defense ministry expert Viktor Kholstov (L)  and Russian ambassador Alexander Shulgin (R), prepare for  a press conference at the Russian embassy in Amsterdam, the Netherlands, 04 April 2018.  The Russian officials spoke in reaction to the
 Mynd: EPA-EFE - ANP
Öryggisráð Sameinuðu þjóðanna kemur saman annað kvöld vegna taugaeitursárásinnar á Sergei og Júlíu Skripal. Ekkert verður af sameiginlegri rannsókn á árásinni.

Mánuður er í dag síðan taugaeitrinu Novichok var beitt gegn Skripal feðginunum í Salisbury á Englandi. Árásin var upphafið að miklu pólitísku þrætuepli sem ekki sér fyrir endann á og mörg ár og líklega áratugir eru síðan svo kalt hefur verið milli Breta, Bandaríkjamanna og bandamanna þeirra og Rússa. 

Framkvæmdastjórn eftirlitsnefndar um bann við notkun efnavopna kom saman á neyðarfundi í Haag í dag. Fundurinn var fyrir luktum dyrum og líklegt að Bretar og Rússar haldi áfram að benda hver á annan. Rússar vilja sameiginlega rannsókn á árásinni en Bretar kölluðu tilboðið siðlaust. Framkvæmdastjórnin greiddi atkvæði um tillögu Rússa í kvöld og hafnaði því að hleypa fleirum að rannsókninni. Rússar óskuðu síðdegis eftir fundi í Öryggisráði Sameinuðu þjóðanna annað kvöld en þarlend yfirvöld vilja sjá sönnunargögn sem Bretar hafa undir höndum.