Athugið þessi frétt er meira en mánaðargömul.

Engin kona oddviti í Norðausturkjördæmi

Chairman of the Independence Party Bjarni Benediktsson casts his ballot Saturday April 27, 2013, as Icelanders vote in a General Election.  According to polls the parliamentary election could return to power the center-right parties that led the country
 Mynd: AP Photo/Brynjar Gauti
Engin kona er í oddvitasæti á framboðslistum þeirra þingflokka sem eru komnir fram í Norðausturkjördæmi. Stofnandi Viðreisnar, Benedikt Jóhannesson, tilkynnti á Rás 1 í morgun að hann ætlaði fram í fyrsta sætið í kjördæminu, þrátt fyrir að búa í Reykjavík. Oddvitar Bjartrar framtíðar, Vinstri grænna, Pírata og Framsóknarflokks eru líka karlar. Allar líkur eru á að skipanin verði eins hjá Samfylkingu og Sjálfstæðisflokki.

Oddvitar framboðslista þingflokkanna í Norðausturkjördæmi eru þeir Preben Pétursson varaþingmaður Bjartrar framtíðar, Steingrímur J. Sigfússon, þingmaður og fyrrverandi formaður VG, Einar Aðalsteinn Brynjólfsson framhaldsskólakennari fyrir Pírata og svo Benedikt Jóhannesson, stofnandi Viðreisnar, sem þó er búsettur í Reykjavík. Þeir Sigmundur Davíð Gunnlaugsson, formaður Framsóknarflokksins, og Höskuldur Þórhallsson þingmaður munu bítast um oddvitasætið á flokksþingi Framsóknar, en sú dagsetning verður ákveðin á miðstjórnarfundi flokksins þann 10. september næstkomandi.

Logi Einarsson, bæjarfulltrúi og nýr varaformaður Samfylkingarinnar, hefur gefið kost á sér til að leiða lista flokksins í kjördæminu, en stillt verður upp á lista og hann tilkynntur á sunnudag. Þá verður kjördæmisþing Sjálfstæðisflokksins í Mývatnssveit um helgina og hefur Kristján Þór Júlíusson heilbrigðisráðherra einn gefið kost á sér til að leiða listann.

Talsmenn Alþýðufylkingarinnar, Dögunar, Flokks fólksins, Húmanistaflokksins og Íslensku þjóðfylkingarinnar hafa sagst ætla að bjóða fram í öllum kjördæmum, en listar eru ekki komnir fram. 

Ein kona var í oddvitasæti í Norðausturkjördæmi fyrir síðustu Alþingiskosningar, Brynhildur Pétursdóttir fyrir Bjarta framtíð. Brynhildur ætlar að hætta á þingi eftir þetta kjörtímabil.