Engin bólusettra fékk leghálskrabbamein

15.11.2017 - 14:00
Mynd með færslu
 Mynd: RÚV
Niðurstöður nýrrar rannsóknar á Norðurlöndum sýna fram á góðan árangur af bólusetningum gegn leghálskrabbameini og forstigsbreytingum þess. Niðurstöðurnar voru nýlega birtar í læknatímaritinu Clinical Infectious Diseases.

2.650 konur á Norðurlöndum voru bólusettar á árunum 2002 til 2003. Til samanburðar tóku álíka margar óbólusettar konur þátt í rannsókninni. 710 konur hér á landi tóku þátt. Niðurstöðurnar sýna að engin þeirra kvenna sem voru bólusettar hafði greinst með leghálskrabbamein eða alvarlegar forstigsbreytingar af völdum þeirra veirutegunda sem bólusett var gegn. Niðurstaðan lofar góðu varðandi árangur bólusetninga hér á landi, segir í frétt á vef Embættis landlæknis.

Almenn bólusetning gegn leghálskrabbameini og forstigsbreytingum þess hófst hér á landi árið 2011 hjá 12 ára stúlkum. Bólusett hefur verið með bóluefninu Cervarix og hefur þátttakan verið um 90 prósent. Á vef Embættis landlæknis segir að of snemmt sé að segja til um árangurinn af bólusetningunni því að nokkur ár þurfi að líða frá bólusetningu og þar til árangur verði merkjanlegur. Niðurstaða rannsóknarinnar og annarra erlendra rannsókna bendi hins vegar ótvírætt til þess að bólusetning muni draga verulega úr líkum á leghálskrabbameini og alvarlegum forstigsbreytingum.

dagnyhe's picture
Dagný Hulda Erlendsdóttir
Síðast:
Þessi þáttur er í hlaðvarpi