Ekki lengur hættustig vegna Bárðabungu

01.06.2015 - 15:22
Mynd: Ómar Ragnarsson
 Mynd: Ómar Ragnarsson
Búið er að færa viðbúnaðarstig almannavarna vegna jarðhræringa í Bárðabungu af hættustigi niður á óvissustig. Þetta kemur fram í tilkynningu frá almannavörnum. Ákvörðunin er tekin í ljósi þess að mælingar sýna að dregið hefur töluvert úr skjálftavirkni.

Aðgangur veittur að hrauninu eftir merktum gönguleiðum
Ríkislögreglustjóri tekur þessa ákvörðun í samráði við Lögreglustjórann á Norðurlandi-eystra. Í tilkynningunni kemur fram að óvissustig þýði að eftirlit sé haft með atburðarrás sem gæti leitt til þess að heilsu og öryggi fólks, umhverfis eða byggðar verði ógnað.

Nýlegar mælingar sýna að gasmengun á svæðinu í og við Holuhraun eru undir hættumörkum og lokun Lögreglu á svæðinu er aflétt. Vatnajökulsþjóðgarður hefur umsjón með svæðinu, og eins og fram hefur komið í fréttum, er stefnt að því að veita aðgang að hrauninu eftir merktum gönguleiðum. Að öðru leyti verður umferð um hraunið óheimil.

Áhrif leysingavatns á Flæðurnar óljós
Umhverfið á Flæðunum hefur breyst í eldsumbrotunum og óljóst hvernig leysingarvatn frá Dyngjujökli finnur sér farveg á ný. Auk þess rann hraunið yfir veginn á ákveðnum stöðum og eru því ferðaleiðir breyttar. Ferðafólk er hvatt til að kynna sér hvernig umferð um svæðið verður háttað í sumar hjá starfsfólki Vatnajökulsþjóðgarðar.

Freyja Dögg Frímannsdóttir
Fréttastofa RÚV