Ekki búið að gera upp mál vegna uppreistar æru

Mynd: RÚV / RÚV
Björt Ólafsdóttir, umhverfisráðherra og þingmaður Bjartrar framtíðar, segir að flokksmenn séu ósammála þingmönnum Viðreisnar, um að Sjálfstæðismenn hafi gert hreint fyrir sínum dyrum varðandi uppreist æru.

Þetta kemur fram í þættinum Forystusætinu sem er á dagskrá RÚV að loknum fréttum klukkan 22. Benedikt Jóhannesson, þáverandi formaður Viðreisnar sagði í Forystusætinu 9. október að Sjálfstæðisflokkurinn væri búinn að gefa nauðsynleg svör varðandi uppreist æru dæmdra kynferðisbrotamanna. Björt Ólafsdóttir segir sinn flokk, Bjarta framtíð, líta mjög ólíkt á málið. Ekki sé hægt að segja að búið sé að gera málið upp.

„Og við setjum á oddinn að við þurfum að ná þessari smán úr okkar samfélagi. Kynbundið ofbeldi og hvernig við meðhöndlum það sem stjórnmálamenn og sem fulltrúar almennings er til skammar. Og það þarf að hætta því.“

Fylgi Bjartrar framtíðar dalað mikið

Björt framtíð var stofnuð upp úr framboði Besta flokksins árið 2012. Flokkurinn fékk rúmlega sjö prósenta fylgi og fjóra þingmenn kjörna í Alþingiskosningunum í fyrra. Björt framtíð myndaði ríkisstjórn með Sjálfstæðisflokknum og Viðreisn, en sleit samstarfinu átta mánuðum síðar vegna þess sem flokkurinn kallaði alvarlegan trúnaðarbrest í samstarfinu. Samkvæmt könnunum mælist Björt framtíð með tveggja til þriggja prósenta fylgi, og næði ekki manni á þing, verði það úrslitin.

Hvernig ætlar flokkurinn að bæta stöðu sína þessa síðustu daga fyrir kosningar og með hverjum vill flokkurinn starfa? Þessum spurningum og fleirum svarar Björt Ólafsdóttir í Forystusætinu sem er aðgengilegur í heild sinni hér og sýndur á RÚV að loknum fréttum kl. 22.

Mynd: RÚV / RÚV

Formenn allra flokka sem bjóða fram til Alþingis 2017 eru teknir tali í þáttunum Forystusætinu sem birtir eru á ruv.is og sýndir á RÚV að loknum fréttum kl. 22. 

Á kosningavef RÚV má taka kosningapróf RÚV, finna frekari upplýsingar um dagskrá RÚV fram að kosningum, bera saman skoðanakannanir, kynna sér framboðin og fleira sem tengist alþingiskosningunum 2017.

johann's picture
Jóhann Bjarni Kolbeinsson
Fréttastofa RÚV
larao's picture
Lára Ómarsdóttir
Síðast:
Þessi þáttur er í hlaðvarpi