Drífa Snædal hefur sagt sig úr VG

16.11.2017 - 15:27
Mynd með færslu
 Mynd: RÚV
Drífa Snædal, fyrrverandi varaþingmaður og fyrrum framkvæmdastjóri Vinstri grænna , hefur sagt sig úr flokknum. Í pistli Drífu til stuðningsmanna VG segir hún ástæðuna vera mögulegt ríkisstjórnarsamstarf við Sjálfstæðisflokkinn. Drífa hafði verið í flokknum í 18 ár.

Vísir segir frá því að Drífa hafi birt pistil til stuðningsmanna VG á Facebook í dag. Þar líki hún mögulegu ríkisstjórnarsamstarfi VG, Sjálfstæðisflokksins og Framsóknar við ofbeldissamband. Hún sé reið og döpur yfir því að flokkurinn hafi farið í formlegar stjórnarmyndunarviðræður við Sjálfstæðisflokkinn. Samstarfið verði eins og að éta skít í heilt kjörtímabil.

Þar segir enn fremur að hún geti ekki kyngt stöðunni eins og hún sé núna. „Ég er döpur og reið en eftir mikla umhugsun þá er mér ómögulegt að taka þátt í þessari vegferð með flokknum sem ég hef verið félagi í í átján ár. Ég óska öllum vinum mínum og fyrrum samstarfsfélögum alls hins besta og vona að ég eigi einhvern tíman afturkvæmt. Ég get ekki kyngt því að við berum ábyrgð á því að koma Sjálfstæðisflokknum til valda eða séum til í að opna þann möguleika. Bara alls ekki.“

Drífa vildi ekki tjá sig um málið við fréttastofu RÚV. Hér fyrir neðan má sjá pistil Drífu í heild sinni. 

"Sá stjórnarsáttmáli sem kemur útúr viðræðunum verður án efa mjög góður og nánast ómögulegt að hafna honum enda munu Katrín, Svandís og Bergþóra vanda til verka og samstarfsflokkarnir hafa allt að vinna. Eftir stendur að við höfum gengist inná viðræður við Sjálfstæðisflokkinn um myndun ríkisstjórnar og sú afdrifaríka ákvörðun er tekin. Við munum ekki breyta Sjálfstæðisflokknum. Innviðir hans eru spilltir og fullir kvenfyrirlitningar og að halda að við breytum honum er meðvirkni í hæsta máta. Sjálfstæðismenn munum fagna stjórnarsáttmála, fara inn í sín ráðuneyti og haga sér nákvæmlega eins og þessi valdastofnun hefur alltaf hagað sér. Við og við vellur gröfturinn upp í formi frændhygli, innherjaviðskipta, skattaskjóla, auðvaldsdekurs, útlendingarandúðar eða skjaldborgar um ofbeldismenn. Þá verður VG í þeirri stöðu að verja samstarfsflokkinn og mörkin munu sífellt færast til í samstarfinu líkt og í ofbeldissambandi. Þetta verður eins og að éta skít í heilt kjörtímabil, ef stjórnin endist svo lengi. Með ákvörðuninni um stjórnarviðræður setti flokkinn niður, trúverðugleikinn laskaðist verulega og vinstrið á Íslandi mun eiga erfitt uppdráttar næstu árin og áratugina. Ef við lítum til langs tíma er það miklu farsælla fyrir okkar málstað að vera í stjórnarandstöðu heldur en ríkisstjórn, jafnvel þó það þýði verstu ríkisstjórn allra tíma til skamms tíma. Ég er döpur og reið en eftir mikla umhugsun þá er mér ómögulegt að taka þátt í þessari vegferð með flokknum sem ég hef verið félagi í í átján ár. Ég óska öllum vinum mínum og fyrrum samstarfsfélögum alls hins besta og vona að ég eigi einhvern tíman afturkvæmt. Ég get ekki kyngt því að við berum ábyrgð á því að koma Sjálfstæðisflokknum til valda eða séum til í að opna þann möguleika. Bara alls ekki. Nokkur góð ráð til félaga minna: Ekki einangra ákvarðanir í litlum hópum, veljið ráðgjafa víða að, forðist „bönker“ stemningu í hreyfingunni, ekki leggja allt á herðar Katrínar, það er ekki sanngjarnt gagnvart henni né öðrum. Og alls ekki stilla þessu upp sem „með eða á móti Katrínu“ eða persónugera á annan hátt, það er ódýrt trikk og verður ekki til að græða sárin."

milla.osk's picture
Milla Ósk Magnúsdóttir
Fréttastofa RÚV