Athugið þessi frétt er meira en 3 ára gömul.

„Depurð meðal íslenskra unglinga er meiri“

13.01.2019 - 20:35
Mynd:  / 
Íslenskir unglingar eru daprari en áður, samkvæmt nýrri rannsókn. Um fjörutíu prósent nemenda í 10. bekk fundu fyrir depurð vikulega eða oftar. Rannsakandi telur skjátíma hafa mikil áhrif. Einungis í Svíþjóð líður unglingum verr.

Depurð meiri en hefur verið

Rannsókn á heilsu og lífskjörum unglinga er gerð í 44 Evrópulöndum á fjögurra ára fresti. Ársæll Arnarsson, prófessor og rannsóknastjóri segir að þróun á líðan unglinga hér á landi sé slæm, marktæk aukning sé á kvíða og depurð unglinga á milli ára.

„Okkar niðurstaða er sú að depurð meðal íslenskra unglinga er meiri nú heldur en hún hefur verið. Við höfum aldrei séð jafn háar tölur eins og núna. Þetta er mjög algengt á Norðurlöndunum, Svíar eru kannski í aðeins verri málum heldur en við,“ segir Ársæll.

40% tíundu bekkinga finna fyrir depurð 

Þrjátíu prósent nemenda í sjötta og áttunda bekk sögðust finna fyrir depurð vikulega eða oftar. Hlutfallið er hærra hjá tíundu bekkingum, nærri fjörutíu prósent. 18% tíundu bekkinga fundu fyrir depurð vikulega og yfir 21% oftar en vikulega. 

Mun færri segjast finna fyrir einmanaleika. Um 13% nemenda í bæði 6. og 8. bekk segjast vera oft eða mjög oft einmana. 17% tíundu bekkinga segjast vera mjög oft eða oft einmana. 

Um helmingur í vandræðum með svefn

Tæplega helmingur unglinga á í vandræðum með svefn. Rúmlega 40% nemenda í sjötta bekk finna fyrir svefnöruðugleikum oftar en vikulega og rúmlega 13% hverja nótt. Um 34% áttundu bekkinga áttu erfitt með svefn oftar en vikulega og um 9% daglega. Það virðist þó draga örlítið úr svefnörðugleikum eftir því sem börnin verða eldri. 38% tíundubekkinga eiga erfitt með svefn einu sinni eða oftar í viku en rúmlega 11 prósent á hverri nóttu.

Ársæll telur að svefnörðugleikar haldist í hendur við depurð. „Svo má alltaf velta fyrir sér hvað það er sem veldur. Það er auðvitað skjánotkun sem er nærtækt svar, vissulega hefur hún mikil áhrif, þau fara seinna sofa. Þau eru æstari þegar þau fara að sofa vegna þess að þau hafa verið að spila leiki og svo framvegis,“ segir Ársæll. „En það eru auðvitað aðrir þættir líka. Það er auðvitað mjög flókið að vera unglingur. Við þurfum að takast á við fullt af nýjum hlutum. Það eru flókin tengsl. Það auðvitað streituvaldandi líka. Ástæðan er ekki bara skjátíminn en við höfum áhyggjur af þessu,“ bætir Ársæll við.

 

holmfridurdf's picture
Hólmfríður Dagný Friðjónsdóttir
Fréttastofa RÚV