Athugið þessi frétt er meira en 11 ára gömul.

Dagsektir skila engu

10.05.2011 - 08:09
Mynd með færslu
 Mynd:
Ákvörðun Umhverfisstofnunar um að leggja dagsektir á Sorporkustöð Vestmannaeyja getur þýtt að bærinn verði að hætta við að kaupa nýja sorpbrennslustöð, segir Elliði Vignisson bæjarstjóri.

Umhverfisstofnun ákvað í gær að leggja 50 þúsund króna dagsektir á Sorporkustöð Vestmannaeyja vegna mengunar frá stöðinni. Unnið hefur verið að úrbótum en það ekki skilað tilætluðum árangri. Elliði Vignisson segist vera alfarið sammála Umhverfisstofnun um að draga þurfi úr mengun og koma starfseminni í samt lag. Hann er hins vegar ósáttur við dagsektirnar og segir þær engu skila.

Ef ákveðið yrði að kaupa nýja sorpbrennslustöð í dag þýddi það að ef til vill yrði hægt að opna hana eftir tvö ár. Fyrst þyrfti að breyta aðalskipulagi, bjóða verkið út og gera eitt og annað til viðbótar í samræmi við íslensk og evrópsk lög. Ákvörðun um að leggja á dagsektir þýði að Vestmanneyingar verði að leita annarra leiða.

Elliði segir að um 50 milljónum króna hafi verið varið í endurbætur á stöðinni og hafi menn vonast til að með því mætti vinna tíma til að koma upp nýrri sorpbrennslustöð. Nú óttast hann að dagsektirnar verði til að áform um slíkt verði að engu.