DADA: 100 ára uppreisn gegn þjóðfélagsháttum

Benedikt Hjartarson doktor í bókmenntafræði
 Mynd: Listasafn Reykjavíkur - Listasafn Reykjavíkur

DADA: 100 ára uppreisn gegn þjóðfélagsháttum

08.11.2016 - 16:22

Höfundar

Í ár eru hundrað ár síðan dada hreyfingin kom fram á sjónarsviðið. Að því tilefni fékk Víðsjá Benedikt Hjartarson til að segja hlustendum frá dadaismanum. Dadaismans verður minnst í Listasafni Reykjavíkur um helgina og einnig með nýrri listdanssýningu Íslenska dansflokksins í Borgarleikhúsinu.

Benedikt heldur erindi um dadaismannog aðra framúrstefnu þess tíma og tengsl við fyrri heimsstyrjöldina í Listasafni Reykjavíkur, Hafnarhúsi á sunnudaginn kl. 13:00. Erindið er hluti af samstarfsverkefni Listasafns Reykjavíkur og Íslenska dansflokksins sem sýnir í nóvember verkið Da Da Dans.

Dada var heiti hreyfingar í listum og bókmenntum sem fól í sér mótvægi gegn viðteknum viðhorfum. Hún kom fram í Sviss árið 1916 og breiddist út víða. Fylgismenn vildu taka listina niður af stalli og láta hana endurspegla samtímann og daglegt líf, með áherslu á tilviljanir og uppákomur. Háð og skrumskæling einkenndu hreyfinguna sem var í eðli sínu uppreisn gegn þjóðfélagsháttum sem leiddu til fyrri heimsstyrjaldar. Í Listasafni Reykjavíkur standa um þessar mundir yfir sýningar og dagskrá sem fjalla um stríð og frið og er fyrirlesturinn hluti af þeirri dagskrá.

Benedikt Hjartarson er prófessor í almennri bókmenntafræði og menningarfræði við Háskóla Íslands. Hann lauk doktorsprófi frá hugvísindasviði háskólans í Groningen árið 2012 með doktorsritgerð um yfirlýsingar evrópskra framúrstefnuhreyfinga í upphafi 20. aldar. Benedikt hefur gefið út fjölda greina og bóka um evrópska framúrstefnu á síðastliðnum árum, m.a. ritið Yfirlýsingar. Evrópska framúrstefnan (2001), sem hefur að geyma safn yfirlýsinga frá tíma evrópsku framúrstefnunnar.

Íslenski dansflokkurinn frumsýnir dansverkið Da Da Dans í Borgarleikhúsinu, kvöldið fyrir fyrirlesturinn, laugardag 12. nóvember. Verkið er eftir Grímuverðlaunahafana Ingu Huld Hákonardóttur og Rósu Ómarsdóttur við frumsamda tónlist Sveinbjörns Thorarensens. Í Da Da Dans munu danshöfundarnir skoða mismunandi leiðir dadaismans og velta fyrir sér hvort þær eigi enn við í dag. Sjá upplýsingar og miðapantanir hér.

Aðgangur á fyrirlestur Benedikts er ókeypis.