Athugið þessi frétt er meira en 8 ára gömul.

Borgin kaupir umhverfisvæna sorpbíla

05.05.2014 - 17:35
Mynd með færslu
 Mynd:
Reykjavíkurborg hefur gert samning um kaup á allt að tólf metanknúnum sorphirðubílum. Fyrstu fjórir bílarnir verða afhentir í október.

Í fréttatilkynningu frá Reykjavíkurborg kemur fram að þrír bílanna eru með tvískiptum sorpkassa þannig að hægt er að sækja tvo flokka af úrgangi samtímis. Fjórði bíllinn er með krana sem gerir m.a. kleift að hífa upp niðurgrafna gáma og þar sem aðkoma er þröng og væri erfitt að komast að með annars konar bílum. Ráðgert er að koma fyrir niðurgröfnum sorpgámum á nýjum byggingasvæðum svo sem í Vesturbugt og á Valssvæðinu. Stórir niðurgrafnir gámar auðvelda sorphirðu og gera hana skilvirkari sérstaklega í þéttri byggð. 

Guðmundur Benedikt Friðriksson, skrifstofustjóri hjá umhverfis- og skipulagssviði borgarinnar, telur mikið hagræði af bílunum, bæði hvað varðar vinnulag og umhverfismál. Ekki þurfi lengur að senda tvo bíla í hverja götu heldur geti sami bíllinn tekið blandaðan úrgang og pappír í tvískipt hólfið.