Athugið þessi frétt er meira en 8 ára gömul.

Björgvin segist saklaus

19.01.2015 - 08:49
Mynd með færslu
 Mynd:
Björgvin G. Sigurðsson, fyrrverandi viðskiptaráðherra og sveitarstjóri Ásahrepps, hafnar ásökunum sveitarstjórnar hreppsins um að hann hafi dregið sér fé. Björgvin lét af störfum sem sveitarstjóri á föstudag eftir sex mánuði. Oddviti sveitarstjórnar segir Björgvin bæði hafa millifært og notað kort.

Ráðherrann fyrrverandi hefur ekki látið ná í sig í síma í morgun, en á Facebook-síðu sinni birti hann færslu klukkan rúmlega hálf níu þar sem hann hafnar öllum ásökunum um fjárdrátt. 

Björgvin segir að skuld hans við hreppinn nemi einum mánaðarlaunum, „að stærstum hluta vegna einnar fyrirframgreiðslu upp á 250 þúsund krónur frá í nóvember í fyrra. Sú greiðsla var rækilega merkt fyrirfram greidd laun til Björgvins og fjarri lagi að tilraun hafi verið gerð til að leyna henni með neinum hætti. Þvert á móti er færslan merkt sem slík í reikningi sveitarfélagsins," segir hann á Facebook. 

Aðrar færslur segir Björgvin hafa komið fram á nótum og hafi sú stærsta verið kaup á myndavél, „ætluð til nota fyrir heimasíðu og fleira, og voru það mín mistök að bera ákvörðun um kaup á henni undir minn yfirmann," segir hann. 

„Það voru mistök og rangt af mér að biðja ekki um heimild frá oddvita vegna fyrirframgreiddra launa og ákvarðana um öll útgjöld. Því biðst ég afsökunar á, enda fór ég þar ekki að reglum um útgjöld, Aldrei stóð annað til að en að þau útgjöld yrðu gerð upp sem laun til mín, likt og merking á fyrirfram launagreiðslunni ber með sér."