Athugið þessi frétt er meira en 1 ára gömul.

Barnshafandi konu bjargað eftir tólf tíma undir rústum

25.01.2020 - 17:03
epa08163594 Rescue workers retrieve a body from the rubble of a destroyed building after an earthquake hit Elazig, Turkey, 25 January 2020. According to reports, at least twenty two people have died and hundreds are injured after a 6.7 magnitude earthquake hit Turkey, also affecting parts of Syria, Georgia and Armenia.  EPA-EFE/STR
 Mynd: EPA-EFE - EPA
Tekist hefur að bjarga rúmlega fjörutíu manns úr rústum eftir jarðskjálfta í austurhluta Tyrklands; en tugir manna eru enn fastir í rústunum. Minnst tuttugu og tveir eru látnir af völdum skjálftans sem var 6,8 að stærð.

Skjálftinn reið yfir rétt fyrir klukkan níu í gærkvöld að staðartíma. Miðja hans er nálægt bænum Sivrice í Elazig-héraði. Skelfing greip um sig meðal fólks sem þusti út á götur af ótta við að hús hryndu ofan á það. 

Yfir tólf hundruð slösuðust í jarðskjálftanum, þar af nokkrir í nágrannabæjum, og hundruð bygginga skemmdust. Strax var farið að leita að fólki í rústunum og voru um tvö þúsund björgunarmenn sendir á vettvang. Það bar árangur, en um fjörutíu manns hefur verið bjargað á lífi úr hrundum byggingum. Meðal þeirra sem björguðust var barnshafandi kona sem hafði verið föst í braki í tólf tíma. Yfir tuttugu er þó enn saknað.

Stjórnvöld hafa dreift teppum, tjöldum og rúmum á svæðinu, til að koma þeim sem hafa ekki í nein hús að venda í öruggt skjól. Þar sem enn mælast eftirskjálftar er mælst til þess að fólk snúi ekki aftur til síns heima strax. Um tvöhundruð eftirskjálftar mældust.  Fólk í Sýrlandi, Líbanon og Íran varð vart við skjálftann í gærkvöld.