Athugið þessi frétt er meira en 2 ára gömul.

Banakonu Kims Jong-nams sleppt úr haldi

03.05.2019 - 06:09
epa07477813 Vietnamese Doan Thi Huong smiles as she is escorted by Malaysian police officers at the Shah Alam High Court in Shah Alam, Malaysia, 01 April 2019. Malaysian prosecutors dropped the murder charge against Doan Thi Huong from Vietnam accused of killing Kim Jong-nam, the half-brother of North Korean leader Kim Jong Un, after she pleaded guilty to the charge of purposely causing injury.  EPA-EFE/FAZRY ISMAIL
 Mynd: epa
Doan Thi Huong, sem fyrir mánuði var sakfelld fyrir að hafa orðið Kim Jong-nam, hálfbróður Kims Jong-uns, að bana á alþjóðaflugvellinum í Kuala Lumpur, er frjáls ferða sinna og lögð af stað til heimalands síns, Víetnam. Lögmaður Huong, Hisyam Teh, greindi þýsku fréttastofunni dpa frá þessu í morgun. Ákærunni á hendur Huong var breytt úr morðákæru í ákæru fyrir líkamsárás áður en dómur var upp kveðinn, og var hún á endanum aðeins dæmd til þriggja ára og fjögurra mánaða fangavistar.

Lögmaður hennar sagðist þá þegar reikna með að skjólstæðingur sinn fengi frelsi í maí, en hefð er fyrir því í Malasíu, segir í frétt Der Spiegel, að stytta mjög þann tíma sem sakamenn eru dæmdir til að dúsa bak við lás og slá. Í mars var hinni indónesísku Siti Aisyah sleppt úr haldi og leyft að hverfa til síns heima eftir að saksóknarar felldu niður allar kærur á hendur henni, en hún var líka ákærð fyrir aðild að morðinu á Kim.

Báðar viku þær sér að Kim í flugstöðinni í Kuala Lumpur í febrúar árið 2017 og báru að sögn á hann taugaeitur sem leiddi hann til dauða. Báðar hafa þær ætíð haldið fram sakleysi sínu og segjast hafa verið narraðar til verksins undir því yfirskini að þetta væri saklaus hrekkur fyrir falda myndavél.  Fjórir grunsamlegir Norður-Kóreumenn forðuðu sér úr landi skömmu síðar.

Yfirvöld í Suður-Kóreu halda því fram að stjórnvöld í Pjongjang beri ábyrgð á morðinu á Kim, en þar á bæ bera menn af sér alla sök. Þeir hálfbræður, Jong-un og Jong-nam, voru ósáttir mjög. Jong-nam var elsti sonur Kom Jong Ils og þótti lengi líklegur til að taka við leiðtogahlutverkinu af föður sínum. Hann féll svo í ónáð og eyddi síðustu árum ævi sinnar á erlendri grundu.