Athugið þessi frétt er meira en 6 ára gömul.

Báðir reynslumiklir flugmenn og kennarar

13.11.2015 - 12:16
Mynd með færslu
Lögreglu-og björgunarsveitarmenn bíða á Bláfjallaafleggjara eftir því að verða fluttir með þyrlu á slysstað.  Mynd: Valgeir Örn Ragnarsson - RÚV
Báðir mennirnir sem létu lífið í flugslysinu sem varð suður af Hafnarfirði síðdegis í gær voru reynslumiklir flugmenn og flugkennarar. Í tilkynningu frá Flugskóla Íslands kemur fram að tilgangur flugsins hafi verið að þjálfa annan flugkennarann á þessa tegund flugvélar. Flugvélin var önnur tveggja flugvéla sem skólinn tók í notkun í þessum mánuði.

Fyrir átti skólinn þrjár aðrar flugvélar af sömu gerð. Sú fyrsta var tekin í notkun hjá skólanum í febrúar í fyrra og tvær í ágúst síðastliðnum.  

Í tilkynningu frá Flugskóla Íslands kemur fram að flugvélin fór í loftið og var áætlað að henni yrði lent á Reykjavíkurflugvelli rúmlega hálftíma síðar. Flugmennirnir hafi verið í samskiptum við flugumferðarstjórn í Reykjavík og tekið nokkrar snertilendingar á Reykjavíkurflugvelli áður en þeir fóru á hefðbundið æfingasvæði suður af Hafnarfirði. Þegar neyðarsendir vélarinnar fór í gang hafi flugumferðarstjórn í Reykjavík strax reynt að ná sambandi við vélina. Þegar ekkert svar barst frá flugvélinni var björgunarlið kallað út. Flugskólinn vinnur nú með lögreglu og Rannsóknarnefnd samgönguslysa að því að upplýsa um orsakir slyssins.

Flugskólinn hefur kallað starfsmenn og nemendur skólans saman í til að veita þeim stuðning og upplýsingar í samvinnu við Rauða Kross Íslands. Samverustund verður í Vídalínskirkju í Garðabæ á sunnudaginn klukkan 17.  

 

Tilkynningin í heild: 

Tilkynning frá Flugskóla Íslands
Ein af kennsluflugvélum Flugskóla Íslands brotlenti í gær suður af Hafnarfirði. Tveir létust í slysinu. 

Báðir hinir látnu voru reynslumiklir flugmenn og flugkennarar. Tilgangur flugsins var þjálfun annars flugkennarans á þessa tegund flugvélar.

Samkvæmt flugáætlun var áætlaður brottfarartími vélarinnar kl. 13:45. Hún fór í loftið um kl. 14 og áætlað var að lenda aftur á Reykjavíkurflugvelli upp úr kl. 14:30.

Flugmennirnir voru í samskiptum við flugumferðarstjórn í Reykjavík. Þeir byrjuðu á að taka nokkrar snertilendingar á Reykjavíkurflugvelli og fóru svo á hefðbundið æfingasvæði suður af Hafnarfirði.

Neyðarsendir fer svo í gang og þá fer flugumferðarstjórn í Reykjavík strax að reyna að ná sambandi við vélina. Þegar ekkert svar berst frá flugvélinni þá er björgunarlið kallað út.

Flugskóla Íslands var tilkynnt um óvissuástand af flugumferðarstjórn og að ekki næðist samband við flugvélina. Í kjölfar þess var viðbragðsáætlun skólans vegna flugslysa virkjuð.

Flugvélin var ein af fimm samskonar vélum sem Flugskólinn rekur. Ein þeirra hefur verið í rekstri hjá skólanum frá því í febrúar 2014, tvær voru teknar í notkun í ágúst síðastliðnum og tvær nú í nóvember. Vélin sem brotlenti var önnur þeirra. Þessi tegund flugvéla hefur verið í notkun frá árinu 2004 og eru þær í rekstri víða um heim.

Flugskólinn vinnur nú með lögreglu og Rannsóknarnefnd samgönguslysa að því að upplýsa um orsakir slyssins.

Hugur allra er hjá aðstandendum flugmannanna. Öllu skólastarfi Tækniskólans hefur verið aflýst í dag. Öll flugkennsla á vegum Flugskóla Íslands fellur auk þess niður fram yfir helgi af virðingu við hina látnu og aðstandendur þeirra.

Flugskólinn hefur kallað starfsmenn og nemendur skólans saman í samstarfi við Rauða kross Íslands síðar í dag. Þar verður þeim veittur stuðningur og upplýsingar. Enn fremur hefur skólinn boðað til opinnar samverustundar í Vídalínskirkju í Garðabæ sunnudaginn 15. nóvember kl. 17.