Athugið þessi frétt er meira en 3 ára gömul.

ASÍ og FFÍ veita flugfreyjum fjárhagsaðstoð

31.03.2019 - 13:54
Mynd með færslu
 Mynd:
Flugfreyjufélag Íslands og Alþýðusamband Íslands ætla að tryggja félagsmönnum Flugfreyjufélagsins fjárhagsaðstoð um mánaðamótin. Þetta kemur fram í bréfi sem formaður félagsins sendi á félagsmenn. Yfir þriðjungur félagsmanna starfaði hjá WOW air.

Í bréfinu segir að þær flugfreyjur og þeir flugþjónar sem misstu vinnuna við gjaldþrot WOW air fá engin laun frá fyrirtækinu um mánaðarmótin. Vegna  stöðunnar hefur stjórn félagsins og ASÍ ákveðið að tryggja fjármagn þannig að starfsfólk fái lágmarksaðstoð.

Þar sem um er að ræða 35 prósent af félagsmönnum Flugfreyjufélagsins mun ASÍ aðstoða við fjárveitingar. Vonir standa til að hægt verði að inna greiðslurnar af hendi í þessari viku en starfsfólk þarf að koma á skrifstofu FFÍ og framselja kröfu í þrotabúið.

Upphæð aðstoðarinnar fer eftir möguleika FFÍ til að afla upplýsinga um marslaun úr þrotabúinu og því er ekki hægt að staðfesta hana sem stendur. Frekari upplýsingar veitir FFÍ til félagsmanna um leið og mögulegt er. Undir bréfið skrifa Berglind Hafsteinsdóttir, formaður Flugfreyjufélags Íslands, og Drífa Snædal, forseti ASÍ. Fréttastofa hefur ekki náð tali að Berglindi undanfarna daga. 

Bréfið í heild sinni: 

Aðstoð Flugfreyjufélags Íslands og ASÍ vegna gjaldþrots WOW air

Flugfreyjur og flugþjónar sem misstu vinnuna við gjaldþrot WOW air munu ekki fá nein laun frá fyrirtækinu nú um mánðarmótin. Eins og gefur að skilja er það mikið fjárhagslegt högg fyrir þessa einstaklinga. Við erum öll með okkar skuldbindingar og reikninga að borga og það eiga ekki allir varasjóði eða vel stæða ættingja að leita til.

Vegna stöðunnar hefur stjórn Flugfreyjufélags Íslands og Alþýðusamband Íslands ákveðið að tryggja fé þannig að starfsfólk fái lágmarks aðstoð í gegnum Flugfreyjufélag Íslands. Þar sem um er að ræða 35% af félagsmönnum Flugfreyjufélagsins mun ASÍ hlaupa undir bagga fjárhagslega og verða þannig hluti af lausninni. Vonir standa til að hægt verði að inna greiðslurnar af hendi í þessari viku en starfsfólk þarf að koma á skrifstofu FFÍ og framselja kröfu í þrotabúið. Upphæð aðstoðarinnar fer eftir möguleika FFÍ til að afla upplýsinga um marslaun úr þrotabúinu og því er ekki hægt að staðfesta hana sem stendur. Frekari upplýsingar veitir FFÍ til félagsmanna um leið og mögulegt er.

Berglind Hafsteinsdóttir
formaður Flugfreyjufélags Íslands

Drífa Snædal,
forseti ASÍ

Mynd með færslu
Berglind Hafsteinsdóttir, formaður Flugfreyjufélags Íslands og Drífa Snædal, forseti ASÍ.