Athugið þessi frétt er meira en 4 ára gömul.

Ásgeir - Afterglow

Mynd: Ásgeir Trausti / Ásgeir Trausti

Ásgeir - Afterglow

12.05.2017 - 16:16

Höfundar

Plata vikunnar þessa vikuna er ný plata Ásgeirs Trausta, Afterglow. Á dögunum gaf tónlistarmaðurinn Ásgeir út sína aðra plötu Afterglow en rúm fjögur ár eru síðan hann gaf út frumraun sína „Dýrð í dauðaþögn“ hér á landi sem var gífurlega vel tekið og hefur selst í um 35 þúsundum eintaka. Ellefu lög er að finna á „Afterglow“ sem öll eru á ensku, að einu undanskyldu.

Afterglow ber öll einkenni listamanns sem hefur þróast og dafnað og tekist á við hlutverk sitt sem alþjóðlegur listamaður en eins og alþjóð veit er Ásgeir frá litla þorpinu Laugarbakka og hafði varla stigið fæti til útlanda þegar hann gaf út „Dýrð í dauðaþögn“ haustið 2012. Það átti eftir að breytast og að sögn listamannsins hefur hann varla lengur yfirsýn yfir þau lönd sem hann hefur heimsótt. Áhrif heimshornaflakksins eru auðheyranleg á „Afterglow“ en þar gætir áhrifa frá tónlistarmönnum eins og James Blake og Bon Iver í bland við R&B tónlist og jafnvel sálar- og kirkjutónlist.

Á plötunni hverfur Ásgeir frá daðri sínu við þjóðlagatónlist sem var einkennandi fyrir „Dýrð í dauðaþögn“ og stingur sér í staðinn á bólakaf í melankólíska raftónlist. Enn og aftur vinnur Ásgeir með föður sínum Einari Georgi Einarssyni sem á heiðurinn að nokkrum textum á plötunni en að auki koma þeir Þorsteinn Einarsson og Júlíus Aðalsteinn Róbertsson að textasmíði. Sem fyrr vinnur upptökustjórinn Guðmundur Kristinn Jónsson náið með Ásgeiri við gerð plötunnar.

Spotify url: 

https://open.spotify.com/album/4WkDUVZCAjismDfaoq95x9

https://www.asgeirmusic.com/

https://www.facebook.com/asgeirmusic/

https://twitter.com/asgeirmusic

https://www.instagram.com/asgeirmusic/

https://www.youtube.com/asgeirmusic

 

Mynd: Kim Matthäi Leland / Wikimedia Commons
Arnar Eggert og Andrea Jóns ræddu plötu Ásgeirs Trausta, Afterglow, í Popplandi 19. maí 2017.