Árni Páll Árnason, formaður Samfylkingarinnar. Mynd: RÚV
Athugið þessi frétt er meira en mánaðargömul.
Árni Páll ráðinn til EES
Árni Páll Árnason, fyrrverandi ráðherra og formaður Samfylkingarinnar, hefur verið ráðinn aðstoðarframkvæmdastjóri Uppbyggingarsjóðs EES að tilnefningu íslenskra stjórnvalda. Hann hefur störf í Brussel á morgun, 1. febrúar, að því er fram kemur í tilkynningu frá utanríkisráðuneytinu.
Ísland, Noregur og Liechtenstein, þau þrjú ríki sem eiga bæði aðild að EFTA, fríverslunarsamtökum Evrópu, og Evrópska efnahagssvæðinu (EES), greiða í uppbyggingarsjóðinn, sem er síðan nýttur í ýmiss konar umbætur og uppbyggingu í þeim 15 ríkjum Evrópusambandsins sem standa lakast í efnahagslegu tilliti: Búlgaríu, Eistlandi, Grikklandi, Kýpur, Lettlandi, Litháen, Möltu, Portúgal, Póllandi, Rúmeníu, Slóvakíu, Slóveníu, Króatíu, Tékklandi og Ungverjalandi.
Árni Páll er lögfræðingur að mennt og sérhæfður í Evrópurétti. Hann var félags- og tryggingamálaráðherra 2009 til 2010 og efnahags- og viðskiptaráðherra 2010 til 2011. Hann sat á þingi frá 2007 til 2016 og gegndi formennsku í Samfylkingunni á árunum 2013 til 2016.
