Athugið þessi frétt er meira en 5 ára gömul.

Alþingi kemur saman í næstu viku

30.11.2016 - 17:43
Mynd með færslu
 Mynd: RÚV
Forseti Íslands hefur fallist á tillögu forsætisráðherra um að þing verði kallað saman þriðjudaginn 6. desember nk. kl. 13.30. Ríkisstjórnin fjallaði um fyrirhugaða þingsetningu á fundi sínum í morgun og þar var jafnframt fjallað um framlagningu fjárlagafrumvarps fyrir árið 2017 og tengdra þingmála sem lögð verða fram í upphafi þings.

Þetta kemur fram í tilkynningu frá skrifstofu forsætisráðuneytisins. Þar er haft eftir Sigurði Inga Jóhannssyni, starfandi forsætisráðherrra, að tímabært sé að Alþingi komi saman „svo tími gefist til þinglegrar meðferðar fjárlaga og mála sem þeim tengjast. Þótt skammur tími sé til stefnu tel ég að með góðri samvinnu verði hægt að ljúka umfjöllun um þau á tilsettum tíma.“

Ekki hefur enn tekist að mynda ríkisstjórn á þeim tíma sem liðin er frá kosningum. Katrín Jakobsdóttir, formaður VG, og Bjarni Benediktsson, formaður Sjálfstæðisflokksins, hafa ræðst við undanfarna daga. Búist er við að það dragi til tíðinda á morgun, 1. desember.
 

freyrgigja's picture
Freyr Gígja Gunnarsson
Fréttastofa RÚV