Athugið þessi frétt er meira en 7 ára gömul.

Almannavarnir vara við stormi

22.12.2013 - 14:29
Mynd með færslu
 Mynd:
Almannavarnadeild ríkislögreglustjóra vill vekja athygli á slæmri veðurspá frá Veðursofu Íslands um jólahátíðina. Spáð er norðanhvassviðri eða -stormi (vindhraða 15-23 m/s) víða um land á aðfangadag, jóladag og fram á annan í jólum.

Veðrinu fylgir talsverð snjókoma og skafrenningur Norðan- og Austanlands og því hætt við að færð spillist á þeim slóðum.

Á morgun, Þorláksmessu, gengur í norðaustanstorm með slyddu, en síðar snjókomu á Vestfjörðum og Ströndum.  Lögreglan á Vestfjörðum bendir á að ef veðurspá gengur eftir getur færð spillst mjög hratt.

Fólk er beðið um að vera ekki á ferðinni á nauðsynjalausu á meðan veðrið gengur yfir.  Þeim sem þurfa að vera á ferðinni er beint á að fylgjast vel með veðurspá, veðurathugunum og færð á vegum.

Gangi spáin eftir fylgir veðrinu tilheyrandi ófærð og mögulega snjóflóðahætta á þeim svæðum sem eru útsett fyrir henni.