Athugið þessi frétt er meira en 3 ára gömul.

Almannavarnir lýsa yfir óvissustigi

Mynd með færslu
 Mynd: Eldfjalla- og náttúruvárhópu
Almannavarnadeild Ríkislögreglustjóra hefur lýst yfir óvissustigi vegna vísbendinga um aukna virkni í Öræfajökli. Þetta er gert í samráði við lögreglustjórann á Suðurlandi sem verður með vakt á þjóðveginum við Kvíá í nótt, að því er segir í tilkynningu frá Ríkislögreglustjóra.

„Jarðskjálftavirkni hefur farið stigvaxandi í Öræfajökli síðasta árið og tilkynningar um jarðhitalykt bárust í gær.  Nú undir kvöldið var staðfest að breytingar á yfirborði Öræfajökuls hafa orðið,“ segir í tilkynningunni. Þar er þó áréttað að engin merki séu um gosóróa eða yfirvofandi eldgos.

Veðurstofan greindi frá því í kvöld að gervihnattamyndir frá Eldjallafræði og náttúruvárhópi HÍ og myndir Ágústs J. Magnússonar flugmanns, úr farþegaflugvél sýndu að nýr sigketill hefði myndast í Öræfajökli. Landhelgisgæslan flýgur í fyrramálið með vísindamenn á svæðið til að kanna aðstæður og taka sýni. Veðurstofan hefur aukið vöktun á svæðinu og fylgist vel með í samráði við jarðvísindamenn Háskóla Íslands og almannavarnir.

„Óvissustig almannavarna er lýst yfir þegar grunur vaknar um að eitthvað sé að gerast af náttúru- eða mannavöldum sem á síðari stigum gæti leitt til þess að heilsu og öryggi fólks, umhverfis eða byggðar sé ógnað. Að lýsa yfir óvissustigi er hluti af verkferlum í skipulagi almannavarna til að tryggja formleg samskipti og upplýsingagjöf á milli viðbragðsaðila,“ segir í tilkynningu Ríkislögreglustjóra.

 

stigurh's picture
Stígur Helgason
Fréttastofa RÚV