Athugið þessi frétt er meira en 4 ára gömul.

Ákæra þingfest í alvarlegu árásarmáli

13.09.2018 - 16:59
Mynd með færslu
 Mynd: RÚV
Konan sem varð fyrir alvarlegri líkamsárás í Vestmannaeyjum hinn 17. september fyrir tveimur árum krefst átta milljóna króna í miskabætur auk vaxta frá manninum sem ákærður er fyrir árásina. Ákæra gegn manninum, sem er 25 ára gamall, var þingfest í Héraðsdómi Suðurlands í dag.

Fréttastofa hefur áður greint ítarlega frá sakargiftum á manninn. Hann er grunaður um að hafa kýlt konuna í andlitið við skemmtistaðinn Lundann þannig að hún fell við.

Skömmu eftir það atvik hafi maðurinn veist á konuna með ítrekuðum höggum og spörkum I andlit og búk og klætt hana úr öllum fötunum og því næst yfirgefið hana þar sem hún lá nakin, mikið slösuð og án bjargar í götunni. Í ákæru kemur fram að konan hafi hlotið áverka í andliti og aftan á hnakka og sár víðar á líkamanum og ofkælingu.

Maðurinn er meðal annars ákærður fyrir brot á 2. málsgrein 218. greinar almennra hegningarlaga, þar sem kveðið er á um allt að sextán ára fangelsi við líkamsárás. Hann er líka ákærður fyrir blygðunarsemisbrot og að hafa komið konunni í það ástand að hún var án bjargar og yfirgefa hana í því ástandi. Við því liggur allt að átta ára fangelsi.

Árásin vakti mikinn óhug þegar málið kom fyrst upp. Konan hafði verið skilin eftir nakin og mjög illa leikin í húsgarði. Hún var meðvitundarlítil þegar hún fannst og svo köld að lögregla taldi að hefði hún ekki fengið aðstoð hefði hún getað látist. Hún var svo bólgin í andliti að hún gat ekki opnað augun. Hún var flutt með þyrlu á Landspítalann í Fossvogi. Fyrst þegar málið kom upp greindu fjölmiðlar frá því að maðurinn hefði verið grunaður um nauðgun. Hann er hins vegar ekki ákærður fyrir það.