Athugið þessi frétt er meira en 3 ára gömul.

Að vera kjaftfor en með milt hjarta

Mynd:  / 

Að vera kjaftfor en með milt hjarta

04.01.2019 - 19:45

Höfundar

Jónas Sigurðsson hlaut Krókinn 2018, viðurkenningu Rásar 2 fyrir framúrskarandi tónlistarflutning á árinu. Við það tækifæri sagði Jónas það mikla gæfu að eiga samtal við þjóðina í gegnum tónlist.

Jónas Sigurðsson kom víða við á árinu 2018 og endaði árið nánast á hundavaði, þar sem nýjasta hljómplata hans kom út í nóvember. Milda hjartað er hans fjórða sólóplata og mögulega hans persónulegasta verk hingað til. Platan hefur fengið lofsamlega dóma og í kjölfar útgáfunnar ferðaðist Jónas með sveit sína og spilaði tónleika meðal annars á Akranesi, Siglufirði, Akureyri, Hvolsvelli, Egilsstöðum, Rifi, Reykjavík og víðar.

Jónas Sigurðsson settist niður með umsjónarfólki Síðdegisútvarpsins á Rás 2 strax eftir verðlaunaafhendinguna og tók hljómsveit sína vitaskuld með. „Maður er aldrei í þessu einn,“ sagði Jónas en með honum í sveitinni eru þeir Arnar Gíslason trommari, Guðni Finnsson bassaleikari, Tómas Jónsson píanóleikari og Ómar Guðjónsson gítarleikari. Jónas var spurður í fyrstu hvernig árið hafi leikið hann og hljómsveit hans.

„Árið var geggjað. Það var gaman hjá okkur. Það var ný plata og það er alltaf rosalega gaman að koma með nýja plötu. Það sem gerist þegar maður er tónlistarmaður þá gefur maður út plötu, spilar tónleika til að fylgja henni eftir og svona hægt og rólega er komið sama prógrammið sem hljómsveitin flytur, sama atriðið. Þá er ofboðslega gott að fara aftur í bílskúrinn, vinna og vinna, koma svo með nýja plötu og jafnvel nýjan vinkil. Það er nýr hópur með mér, ekki Ritvélar framtíðarinnar og við höfum spilað út um allt land og fengið frábærar móttökur, “ segir Jónas sem ferðaðist grimmt með sveit sína á aðventunni.

Eru Íslendingar almennt duglegir að mæta á tónleika? „Ég myndi segja það. Það er mjög skemmtileg og jákvæð þróun. Það er mikið talað um það að tónlist sé í mikilli varnarstöðu, því diskasala hefur dregist saman, sem er rétt. En á móti kemur að fólk virðist koma í meira magni á tónleika, svona síðustu tíu ár. Bæði hér í Reykjavík og um allt land. Fólk er þá tilbúið í tónleikaupplifun en ekki endilega að leita að næsta balli,“ segir Jónas sem telur að tónlistarfólk geti spilað sína frumsömdu tónlist heilt kvöld og gestir taki því með opnu hjarta.

Jónas var að lokum spurður út í Milda hjartað, nýjustu plötuna og um það hvort hann væri hættur að vera kjaftfor? „Ég reyni að vera kjaftfor en með milt hjarta. Er það ekki góð blanda? Nú er ég auðvitað karlmaður og karlmennska hefur verið mér hugleikin. karlemnnskan virðist oft snúast meira um það að standa upp á palli og rífast og skammast. Frekar en hafa mýkt. Ég hef síðustu ár hugsað mikið um þessa blöndu, til þess að vera heil manneskja þarf maður að getað verið þarna á milli. Þú þarft að eiga þennan styrk til að standa fyrir því sem þú trúir á en svo að eiga þessa mýkt að þora að lifa með opið hjarta,“ segir Jónas Sigurðsson nýr handhafi Króksins, viðurkenningar Rásar 2 fyrir framúrskarandi lifandi flutning á árinu 2018.