8. þáttur - Mexíkósk súpa

Mexíkósk súpa

 1 dl vatn

400 g kjúklingakjöt (má sleppa og nota 2 sætar kartöflur í staðinn, ég geri það)

1 rauð íslensk paprika

½ stk rautt chili, fræhreinsað eða 1 grænt chili (mildara) og má sleppa hvorutveggja

1 laukur, blaðlaukur eða 5-6 hvítlauksrif pressuð (eða sitt lítið af hverju)

2 vænar tsk. paprikuduft

1 sæt kartafla (ef ég sleppi kjúklingnum, sem ég geri oft, þá nota ég í allt um 2 sætar kartöflur)

6 þroskaðir íslenskir lífrænir tómatar (eldrauðir)

3 msk. tómatmauk

1 l vatn

1 tsk. sjávarsalt

2 vænar msk. msg-laus lífrænn grænmetiskraftur

2 dl aukaefnalaus (lífræn mild) tacosósa

100 g rjómaostur, ½-1 dós sýrður rjómi eða 200 ml aukefnalaus kókosmjólk

1. Skerið kjúklinginn í munnbita.
2. Þvoið paprikuna og chiliið og fræhreinsið, skerið í litla bita.
3. Skerið laukinn smátt.
4. Steikið kjúkling, papriku, chili og lauk í um einum desilítra af vatni í nokkuð stórum potti við vægan hita, látið paprikuduftið krauma með.
5. Þvoið og afhýðið sætu kartöfluna, skerið hana í munnbita og skutlið í pottinn.
6. Þvoið og skerið tómatana í litla bita og bætið út í pottinn.
7. Bætið svo tómatmauki, vatni, sjávarsalti og krafti í pottinn og látið sjóða í um 20 mínútur.
8. Bætið við salsa og rjómaosti/kókosmjólk/sýrðum og látið hitna ef þarf í örfáar mínútur.
9. Berið fram með nachos, sýrðum rjóma og rifnum feitum osti eða mozzarella

- Munið að láta aldrei hráan kjúkling (sem og kjöt almennt) komast í snertingu við hrátt grænmeti eða salat. Best að nota sérbretti undir hráan kjúkling. Snjallt er að eiga bretti í nokkrum litum og halda þannig hráefnunum enn betur aðskildum.

- Ég mæli með hreinu lífrænu nachos með sjávarsalti án allra aukaefna!

- Það má svo sannarlega líka steikja eða grilla kjúklinginn. Munið að nota vægan hita.

- Þá má bera kjúklinginn fram sér með súpunni og þá er líka auðvelt að mauka súpuna ef einhver á heimilinu „borðar ekki grænmeti“ nema það sé dulbúið (maukað).

- Tómatar þurfa að þroskast á stofuborði eins og ávextir til að verða eldrauðir og sætir.