Athugið þessi frétt er meira en 2 ára gömul.

64 metra „fituhlunkur“ í ensku holræsi

09.01.2019 - 03:55

Erlent · Bretland · Evrópa · Umhverfismál

Mynd:

64 metra langur fituhlunkur fannst í holræsakerfi strandbæjarins Sidmouth í Devonskíri á Suður-Englandi á dögunum. Talið er að það muni taka allt að átta vikur að fjarlægja hlunkinn, sem samanstendur mestmegnis af matarolíu, olíu, steikarfeiti og blautþurrkum. Fituhlunkurinn, sem sagður er lengri en sex strætisvagnar af stærri gerðinni, fannst í holræsinu undir aðalgöngugötu bæjarins, aðeins örfáa metra frá ströndinni.

Andrew Roantree, yfirmaður skolpmála hjá South West-veitum, segir þetta stærsta fituhlunk sem fundist hefur á þessum slóðum síðan fyrirtækið tók við veitukerfinu og hvetur fólk til að hætta að „ala“ hann.

„Sem betur fer fannst hann í tæka tíð og ógnar því ekki baðströndinni. Ef þið standið við eitt áramótaheit þetta árið, látið það þá vera heit um að hella ekki fituefni, olíum eða steikarfeiti í niðurföllin og sturta ekki blautþurrkum niður úr klósettunum. Setjið lagnirnar ykkar í megrun og hættið að ala fituhlunkinn,“ segir hann í samtali við blaðamann The Guardian.

Veitufyrirtækið segir að hlunkurinn stækki með svipuðum hætti og snjóbolti sem hleður utan á sig eftir því sem hann rúllar lengra. Blautþurrkur sem sturtað er niður hlaði utan á sig alls kyns feiti sem storkni og hlaði utan á sig fleiri blautþurrkum og enn meiri feiti og svo koll af kolli uns úr verður risavaxinn og grjótharður fituhlunkur. Áætlað er að hefja vinnu við að brjóta hlunkinn niður í næsta mánuði, ef úrkoma verður ekki of mikil. Vinnuaðstæður þeirra sem það gera eru ekkert til að hrópa húrra fyrir og kallar verkið á hvort tveggja hlífðargalla frá toppi til táar og súrefnisgrímur.