630 milljónir í að efla geðheilbrigðisþjónustu

21.02.2019 - 16:34
Mynd með færslu
 Mynd: Vilhjálmur Þór Guðmundsson - RÚV
Heilbrigðisráðherra tilkynnti í dag hvernig 630 milljónum króna af fjárlögum ársins verður ráðstafað til að efla geðheilbrigðisþjónustu á landsvísu. Stöðugildum sálfræðinga í heilsugæslum verður fjölgað og geðheilsuteymi verða efld og byggð upp um allt land.

Svandís talaði á fundinum um mikilvægi þess að landsmenn eigi allir greiðan aðgang að góðri heilbrigðisþjónustu, hvort sem vandamálin eru af líkamlegum eða geðrænum toga. Snemmtæk íhlutun sé grundvallaratriði og forvarnir eigi að skipa ríkan sess. Sú uppbygging geðheilbrigðisþjónustu á landsvísu sem nú eigi sér stað stórauki möguleikann á því að veita fólki þessa mikilvægu þjónustu í heimabyggð.

Í tilkynningu kemur fram að við ákvörðun um skiptingu fjárins hafi verið tekið mið af áætlunum heilbrigðisstofnana um uppbyggingu og eflingu geðheilsuteyma, íbúafjölda í viðkomandi heilbrigðisumdæmum og eins var horft til lýðheilsuvísa Embættis landlæknis. Einnig var unnið með markmið þingsályktunar um stefnu og aðgerðaáætlunar í geðheilbrigðismálum að leiðarljósi.

Þá kemur fram að heilsugæslan þurfi að vera í stakk búin til að takast á við þau heilbrigðisvandamál fólks sem algengust eru, hvort sem þau eru líkamleg eða geðræn. „Uppbygging sálfræðiþjónustu innan heilsugæslunnar er liður í því að efla heilsugæsluna hvað þetta varðar. Þannig á fólk að geta fengið meðferð og stuðning vegna algengustu geðraskana, svo sem þunglyndis og kvíðaraskana í heilsugæslunni.“

Geðheilsuteymin eru hugsuð sem annars stigs heilbrigðisþjónusta og er þjónustan veitt á grundvelli tilvísana. Þar er tekið á vanda fólks þegar hann er flóknari en svo að hægt sé að mæta honum innan heilsugæslunnar. Tvö geðheilsuteymi eru starfandi á höfuðborgarsvæðinu og verið er að undirbúa opnun þess þriðja. 

Ef litið er á úthlutun fjárins milli heilbrigðisumdæma fá sálfræðingar á höfuðborgarsvæðinu 45 milljónir, Heilsugæsla höfuðborgarsvæðisins fær 322 milljónir, Heilbrigðisstofnun Vesturlands 46 milljónir, Heilbrigðisstofnun Vestfjarða 21 milljón, Heilbrigðisstofnun Norðurlands 50 milljónir, Heilbrigðisstofnun Austurlands 35 milljónir, Heilbrigðisstofnun Suðurlands 58 milljónir og Heilbrigðisstofnun Suðurnesja 53 milljónir.

 

ingvarthor's picture
Ingvar Þór Björnsson
Fréttastofa RÚV
Síðast:
Þessi þáttur er í hlaðvarpi