Athugið þessi frétt er meira en mánaðargömul.

292 ræður á tveimur sólarhringum

26.02.2014 - 16:59
Mynd með færslu
 Mynd:
Karl Garðarsson, þingmaður Framsóknarflokksins, sagði á Alþingi í dag að þingmenn stjórnarandstöðunnar hefðu síðastliðna tvo sólarhringa kvatt sér hljóðs 292 sinnum undir liðnum fundarstjórn forseta í tengslum við umræðuna um ESB og talað í 321 mínútu.

Karl sagði að því væri ekki trúandi að fundarstjórn forseta væri svona slæm heldur væri skýringa að leita annars staðar. Hann upplýsti jafnframt að Katrín Júlíusdóttir, þingmaður Samfylkingarinnar, hefði flutt flestar ræður undir þessum lið eða sextán. Skammt undan væru Steingrímur J. Sigfússon og Árni Páll Árnason.

Karl sagði að það gæti verið að þessi röð hefði breyst þar sem Valgerður Bjarnadóttir hefði komið mjög sterk inn og væri jafnvel komin upp að hlið Katrínar.

Karl sagði að samkvæmt þingsköpum mætti hver þingmaður koma upp tvisvar sinnum, eina mínútu í senn, til að gera athugasemdir við fundarstjórn forseta. Hann sagði að gera yrði þá lágmarkskröfu að þingmenn kæmu upp til að ræða það sem þessi liður snérist um - fundarstjórn forseta.  „Eitt stærsta vandamál þingsins er vantraust - vantraust almennings sem hefur fengið nóg af innantómu pexi þingmanna. Það er alltaf stutt í málþófið og það er til skammar,“ sagði Karl og bætti við það væri ekki ólíklegt að þingmenn stjórnarandstöðunnar kæmi upp 292 sinnum á næstu tveimur sólarhringum til að ræða fundarstjórn forseta.