Athugið þessi frétt er meira en 2 mánaða gömul.

Búið að taka fyrstu skýrslur af hinum grunuðu

Mynd með færslu
 Mynd: Sölvi Andrason - RÚV
Skýrslutaka fór fram í dag í fangelsinu á Hólmsheiði yfir tveimur konum og einum karli, sem eru í haldi vegna gruns um aðild að manndrápi í Ólafsfirði, samkvæmt heimildum fréttastofu.

Rannsóknardeild lögreglunnar á Norðurlandi eystra segir unnið að rannsókn málsins en veitir engar frekari upplýsingar að svo stöddu.

Fjögur voru handtekin skömmu eftir að karlmaður lést af völdum stungusára í heimahúsi í Ólafsfirði aðfaranótt mánudags, þrjú þeirra voru úrskurðuð í vikulangt gæsluvarðhald. Meðal þeirra sem sitja í gæsluvarðhaldi er eiginkona hins látna.

Lögregla haft afskipti af þeim áður

Fólkið á sér sögu hjá lögreglu og íbúar kannast við ógnandi hegðun af þeirra hálfu. Þrjú eru í gæsluvarðhaldi í fangelsinu á Hólmsheiði vegna málsins.

Íbúar í Ólafsfirði sem rætt hafa við fréttastofu segja að fólkið hafi verið í töluverðri óreglu um hríð. Arnfríður Gígja Arngrímsdóttir aðstoðaryfirlögregluþjónn segist ekki geta veitt neinar upplýsingar um hvort öll þau sem í gæsluvarðhaldi sitja séu grunuð um að hafa átt þátt í bana þess sem lést.