Athugið þessi frétt er meira en 2 mánaða gömul.

Fréttir: Stunginn til bana í Ólafsfirði

03.10.2022 - 12:09
Karlmaður var stunginn til bana í heimahúsi í Ólafsfirði í nótt. Fjórir voru handteknir vegna málsins. Ekki hefur verið tekin ákvörðun um hvort farið verður fram á gæsluvarðhald yfir einhverjum þeirra.

Meira en 430 Venesúelamenn hafa fengið vernd á Íslandi á þessu ári. Þeir eru um helmingur hælisleitenda hér á landi, að Úkraínumönnum undanskildum sem eru fleiri en öll önnur þjóðerni samanlagt. 
 
Tveir frambjóðendur lýstu yfir sigri í forsetakosningum í Bosníu-Hersegóvínu í nótt. Kosningarnar fara fram í skugga mestu innanríkisdeilna í ríkinu í þrjá áratugi. 

Lula da Silva fékk fleiri atkvæði en Jair Bolsonaro, forseti Brasilíu, í kosningum í gær. Þar sem hann fékk ekki yfir helming atkvæða verður önnur umferð haldin. 

Ingibjörg Sólrún Gísladóttir, fyrrverandi utanríkisráherra, segir ákveðið munstur vera í sögum af meintum kynferðisbrotum Jóns Baldvins Hannibalssonar. Hann hafi hagað sér eins og rándýr sem velur bráð sína af kostgæfni. 

Sænski erfðafræðingurinn Svante Pääbo hlýtur Nóbelsverðlaunin í læknisfræði í ár fyrir rannsóknir sínar á erfðamengi Neanderdalsmanna og þróun mannsins. 

alexandergk's picture
Alexander Kristjánsson
Fréttastofa RÚV