Athugið þessi frétt er meira en 1 mánaða gömul.

Langanesbyggð styður breytingar á strandveiðum

Mynd með færslu
 Mynd: RÚV - Ágúst Ólfsson
Sveitarstjórn Langanesbyggðar styður breytingar á fyrirkomulagi strandveiða sem hafi það að markmiði að auka sanngirni og jafna dreifingu afla um allt land.

„Sveitarstjórn Langanesbyggðar telur jákvætt að stjórnvöld hafi nú til afgreiðslu á Alþingi breytingar á fyrirkomulagi strandveiða og svæðaskiptingu með það að markmiði að sanngirni aukist,“ segir í ályktun sem samþykkt var á síðasta fundi sveitarstjórnar Langanesbyggðar.

Þar áréttar sveitarstjórn að strandveiðar hafi verið settar á laggirnar á sínum tíma til auðvelda áhugasömum smábátasjómönnum að róa á færabátum á grunnslóð. „Þetta var gott framtak og með strandveiðum hefur færst aukið líf í hafnir landsins – ekki síst á minnstu stöðunum.“

„Kerfið þarf að vera eins sanngjarnt og hægt er gagnvart öllum veiðisvæðunum fjórum hringinn í kringum um landið. Vonandi tekst að gera breytingar til að aflinn dreifist jafnar út um allt land,“ segir að lokum í ályktun sveitarstjórnar Langanesbyggðar.