Athugið þessi frétt er meira en 2 mánaða gömul.

Salman Rushdie stunginn á sviði í New York

12.08.2022 - 15:33
epa06023907 (FILE) - British-Indian writer Salman Rushdie presents his book 'Two Years Eight Months and Twenty-Eight Nights' in Aviles, Spain, 07 October 2015 (reissued 12 June 2017). Rushdie will celebrate his 70th birthday on 19 June 2017.  EPA/JL CEREIJIDO
 Mynd: EPA
Rithöfundurinn Salman Rushdie var stunginn í hálsinn þegar hann var á sviði í New York á þriðja tímanum í dag. Hann hefur verið fluttur á sjúkrahús með þyrlu. Rushdie hefur sætt ofsóknum árum saman eftir útgáfu bókar sinnar Söngvar Satans. Maður er í haldi lögreglu vegna árásarinnar.

Samkvæmt tilkynningu frá ríkisstjóra í New York er Rushdie enn á lífi. Miðað við upplýsingar frá umboðsmanni hans hefur hann þegar gengist undir skurðaðgerð.

Breska ríkisútvarpið hefur eftir vitnum að maður hafi hlaupið upp á svið þegar Rushdie ávarpaði samkomu í bænum Chautauqua í New York í Bandaríkjunum. Maðurinn hafi svo látið högg dynja á rithöfundinum. Viðstaddir flykktust á sviðið til varnar Rushdie skömmu síðar og yfirbuguðu árásarmanninn. Síðar var greint frá að árásarmaðurinn hefði verið vopnaður hníf og hafi tekist að veita Rushdie nokkur stungusár, eitt þeirra á háls.

Líflátshótanir vegna meints guðlasts

Salman Rushdie fæddist 1947 í Indlandi, en hefur ríkisborgararrétt bæði í Bretlandi og Bandaríkjunum. Hann er margverðlaunaður fyrir ritverk sín, en einna þekktastur er hann fyrir skáldsöguna Miðnæturbörnin, en síðar Söngva Satans. Hún olli miklu fjaðrafoki, einna helst meðal múslima, vegna lýsinga á Múhammeð spámanni og var hann sakaður um guðlast.

Dauðadómur yfir öllum sem miðluðu efni bókarinnar

Þess var karfist að bókin yrði bönnuð og hún var tekin úr sölu í fjölmörgum bókabúðum auk þess sem útgefendur í hinum múslimska heimi neituðu að gefa verkið út. Hápunktur baráttunnar gegn verkinu var svo yfirlýsing eða öllu heldur fyrirskipun, Fatwa, Ayatollah Khomeinis þáverandi erkiklerks í Íran um dauðadóm yfir öllum þeim sem kæmu að útbreiðslu verksins.

Hann fór í felur í næstum áratug vegna hótana.

Fréttin var uppfærð klukkan 18:44

Author Salman Rushdie is tended to after he was attacked during a lecture, Friday, Aug. 12, 2022, at the Chautauqua Institution in Chautauqua, N.Y., about 75 miles (120 km) south of Buffalo. (AP Photo/Joshua Goodman)
 Mynd: AP - RÚV
Rushdie veitt aðhlynning eftir árásina.