Athugið þessi frétt er meira en 1 mánaða gömul.

Skýjað um land allt, rigning sunnanlands

05.07.2022 - 07:12
Mynd með færslu
 Mynd: RÚV
Veðurhorfur samkvæmt spá Veðurstofu Íslands, útlit er fyrir breytilega átt 3 til 8 m/s, en norðvestan 8 til 13 m/s fram yfir hádegi við norðausturströndina. Skýjað að mestu og þurrt að kalla. Hiti á bilinu 10 til 15 stig, heldur svalara norðaustanlands.

Úrkomusvæði nálgast úr suðvestri sem nær inná sunnanvert landið. Búast má við súld eða rigningu á þeim slóðum síðdegis. 

Í hugleiðingum veðurfræðings segir að norðanáttin hafi hrellt íbúa í norðausturfjórðungi landsins undanfarið. Leifar af henni lifi enn úti við ströndina og að norðvestan strekkingur verði þar þangað til síðdegis.

Á morgun verður vindur með hægasta móti. Skýjað og úrkomulítið á Suður- og Vesturlandi, en bjart með köflum. Gæti sést til sólar á Norður- og Austurlandi. Svipaðar hitatölur áfram. 

Síðdegis á morgun nálgast lægð og regnsvæði úr suðvestri og fer því að rigna vestanlands annað kvöld. Aðfaranótt fimmtudags má búast við rigningu á landinu öllu.

Veðurhorfur næstu daga:

Á fimmtudag
Sunnan og síðar vestan 8-13 m/s. Víða rigning eða skúrir, en þurrt að kalla austanlands eftir hádegi. Hiti 10 til 20 stig, hlýjast á Austfjörðum.

Á föstudag
Vestlæg átt og súld eða rigning með köflum, en yfirleitt þurrt á Austfjörðum og Suðausturlandi. Hiti 9 til 17 stig, hlýjast suðaustanlands.

Á laugardag
Sunnanátt og rigning, en þurrt á norðaustanverðu landinu. Hiti 10 til 18 stig, hlýjast norðaustantil.

Á sunnudag
Suðlæg eða breytileg átt og rigning öðru hvoru með hita 10 til 14 stig, en þurrt að kalla austanlands með hita að 18 stigum.

Á mánudag
Norðlæg átt með súld eða rigningu norðanlands og kólnar, en stöku skúrir syðra.

sigurdurk's picture
Sigurður Kaiser
Fréttastofa RÚV