Athugið þessi frétt er meira en 1 mánaða gömul.

Burhan segir herstjórnina ætla að stíga til hliðar

epa09994287 Sudanese protesters chant slogans during a rally marking the third anniversary of a crackdown on mass sit-in outside the army's headquarters in 2019, in Khartoum, Sudan, 03 June 2022. Due to army attack, many people were killed by members of the security forces during a violent cleansing operation on 03 June 2019.  EPA-EFE/ELA YOKES
 Mynd: EPA
Leiðtogi herforingjastjórnarinnar í Súdan segist ætla að koma því til leiðar að borgaraleg stjórn setjist að völdum í landinu. Mótmælendur í landinu og alþjóðasamfélagið hafa lengi krafist þess.

Abdel Fattah al-Burhan, leiðtogi hersins lýsti þessu yfir í sjónvarpsávarpi í gær og sagði að herinn stigi til hliðar úr samningaviðræðum sem Sameinuðu þjóðirnar og samtök ríkja á svæðinu hafa komið á.

Þannig sagðist Burhan vilja skapa rými fyrir pólítísk öfl og andófsmenn til að koma á borgaralegri stjórn í landinu. Helstu leiðtogar borgaralegra afla þvertóku fyrir þátttöku í viðræðunum sem hófust í síðasta mánuði.

Hið sama á við um fulltrúa óformlegra andófshópa sem komu fram á sjónarsviðið í aðdraganda uppreisnarinnar gegn einræðisherranum Omar al-Bashir árið 2019. 

Herinn vék borgaralegri ríkisstjórn frá völdum í október í fyrra, handtók ráðherra og borgaralega embættismenn. Ríki heims og alþjóðastofnanir fordæmdu athæfið og mannskæð mótmæli brutust út í landinu. 

Burhan flutti ávarp sitt á fimmta degi nýjustu hrinu mótmæla en á fimmtudag féllu níu manns fyrir hendi öryggissveita hersins. Samkvæmt frétt AFP-fréttaveitunar virðast mótmælendur ekki trúaðir á loforð Burhans og segjast ætla að fella stjórn hans líkt og al-Bashirs árið 2019. 

Burhan sagði að í kjölfar valdaskipta yrði fullveldisráðið svokallaða leyst upp, sem hefur undir stjórn Burhans ráðið ríkjum. Þess í stað yrði nýtt hernaðarráð sett á laggirnar sem eingönu væri ætlað að sinna öryggis- og varnarmálum.