Mynd: AP
Athugið þessi frétt er meira en 1 mánaða gömul.
13 fórust þegar leki kom að 25 tonna tanki með klórgasi
Þrettán létust og hundruð þurftu bráðrar aðhlynningar við þegar mikill og skyndilegur leki kom að tanki fullum af klórgasi við höfnina í borginni Aqaba í sunnanverðri Jórdaníu í dag. Faisal al-Shaboul, talsmaður stjórnvalda, segir að um 250 manns hafi slasast og í frétt Al Jazeera kemur fram að nær 200 hafi enn verið á sjúkrahúsi þegar liðið var á kvöldið.
Lekinn varð þegar 25 tonna tankur af klórgasi sem flytja átti til Djíbútí losnaði þegar verið var að hífa hann um borð í skip og féll á þilfar þess. Höfninni og stóru svæði umhverfis hana var lokað þegar slysið varð og íbúðarhús í nágrenninu rýmd á meðan sérfræðingar freistuðu þess að stöðva lekann. Lögregla og vinnueftirlit rannsaka tildrög slyssins.
