Albanese tekinn við sem forsætisráðherra Ástralíu

Penny Wong verður utanríkisráðherra í stjórn Albaneses. Hún hefur verið öldungadeildarþingmaður fyrir Suður-Ástralíu frá 2002 og tvisvar gegnt ráðherraembætti áður.

Við embættistökuna lagði Albanese ríka áherslu á áherslur stjórnar sinnar í loftslagsmálum. Enn liggur ekki fyrir hvort Verkamannaflokkur forsætisráðherrans hefur náð hreinum meirihluta í fulltrúadeild þingsins.

Bráðabirgðatölur sýna að enn sé flokkurinn fjórum sætum frá því og verði það niðurstaðan þykir líklegast að Albanese leiti stuðnings græningja og óháðra þingmanna. Talið er að nokkrir dagar kunni að líða uns öll póstatkvæði hafa verið talin.  

Segir breytinga að vænta í stjórnarstefnu Ástralíu

Grannt verður fylgst með því hvort samskiptin við stjórnvöld í Kína verði mildari nú en í stjórnartíð Scotts Morrisons, forvera Albaneses. Ráðherrafundir ríkjanna hafa ekki verið haldnir undanfarin tvö ár. 

Albanese kveðst ætla að halda einkafundi með Joe Biden Bandaríkjaforseta, Fumio Kishida forsætisráðherra Japans og Narendra Modi forsætisráðherra Indands á þriðjudaginn.

Þá hefst ráðstefna þessarra fjögurra ríkja í Tókíó, höfuðborg Japans. Albanese segir mikið forgangsmál að taka þátt í henni og að með fundunum geti hann sent þau skilaboð að breytinga sé að vænta á stjórnarstefnu Ástrala.

Einkum eigi það við um loftslagsmál en í kosningabaráttunni hét Albanese því að herða aðgerðir til að draga úr kolefnislosun. Albanese stoppar stutt í Japan og flýgur aftur heim á miðvikudag.