Athugið þessi frétt er meira en 2 mánaða gömul.

Guterres hvetur Rússa til að opna hafnir Úkraínu

epa09956352 United Nations Secretary-General Antonio Guterres (L) speaks as United States Secretary of State Anthony Blinkin (L) listens during the ‘Global Food Security Call to Action’ meeting about global food security called by the United States that gathered foreign ministers from various countries, at the United Nations headquarters in New York, New York, USA, 18 May 2022. The meeting was called in response to worldwide shortage of food supplies caused by the COIVD-19 pandemic as well as by Russia's war in Ukraine.  EPA-EFE/JUSTIN LANE
 Mynd: EPA-EFE - EPA
Aðalframkvæmdastjóri Sameinuðu þjóðanna varar við hættu á að hungur kunni að steðja að stórum hluta mannkyns verði ekki þegar brugðist við. Hann hvetur Rússa til að heimila kornflutning frá Úkraínu.

Þetta kom fram í máli Antonio Guterres á ráðstefnu um matvælaöryggi í New York þar sem hann sagði að innrás Rússa í Úkraínu bætti enn á þann matvælaskort sem skapast hefði vegna hækkandi hitastigs og kórónuveirufaraldursins.

Guterres áréttaði að síðastliðin tvö ár hefði fjöldi þeirra sem búa við matvælaóöryggi tvöfaldast. Nú væru 276 milljónir manna í þeirri stöðu og að hungursneyð væri raunveruleiki meira en hálfrar milljónar manna. 

„Stríðið í Úkraínu hefur magnað alla þessa þætti upp,“ sagði Guterres í ávarpi sínu á ráðstefnunni sem Antony Blinken, utanríkisráðherra Bandaríkjanna, stýrir.

Guterres bætti við að tugir milljóna gætu bæst í hóp þeirra sem fæðuskortur blasir við. Slíku ástandi fylgdi vannæring og hungursneyð sem varað gæti um árabil.

Fyrir innrásina fluttu Úkraínumenn út 4,5 milljónir tonna af landbúnaðarafurðum mánaðarlega. Þaðan koma tólf prósent alls þess hveitis sem heimurinn þarfnast, fimmtán prósent alls kornmetis og helmingur allrar sólblómaolíu.

Eftir að Rússar lokuðu helstu höfnum Úkraínu er mun erfiðara að koma vörunum úr landi og því hvetur Guterres rússnesk stjórnvöld til að tryggja útflutning þaðan.

Það sé eina lausnin á matvælavanda heimsins en Guterres sagði jafnframt brýnt að rússnesk matvæli og áburður bærust á markaði heimsins. Stríðið og viðskiptaþvinganir gegn Rússum hafa skapað skort á framangreindum vörum og leitt af sér miklar verðhækkanir á mat og eldsneyti.