Athugið þessi frétt er meira en 2 mánaða gömul.

Segir brýnt að Kanada viðurkenni brot gegn frumbyggjum

Mynd með færslu
 Mynd: AP
Karl Bretaprins segir brýnt að Kanadastjórn viðurkenni brot gegn frumbyggjum í landinu. Hann segir sömuleiðis mikilvægt að sættir náist. Karl er á þriggja daga opinberri heimsókn í Kanada ásamt Camillu eiginkonu sinni.

Justin Trudeau, forsætisráðherra tók á móti þeim ásamt Mary Simon sem er fyrsti yfirlandsstjóri Kanada af ættum frumbyggja. Brot Kanadastjórnar gegn frumbyggjum barst fljótlega í tal.

Simon hvatti prinsinn til að ræða við fulltrúa þeirra í heimsókn sinni, sem hún sagði að hlyti að auka á líkur á því að skilningur og virðing aukist og ekki síst að lausn finnist.

Talið er að þúsundir barna af frumbyggjaættum hafi látist af völdum illrar umhirðu og vannæringar í heimavistarskólum víðs vegar um Kanada. Á annað þúsund ómerktra grafa hefur fundist á undanförnum misserum og árum. 

Um 150 þúsund frumbyggjabörn voru send í heimavistarskóla frá lokum nítjándu aldar og fram á tíunda áratug þeirrar tuttugustu. Grafir hafa fundist í Bresku Kólumbíu og Saskatchewan, sem kveikti mikla reiði meðal almennings í Kanada.

Heimsókn Karls og Camillu til Kanada er hluti hátíðahalda í tilefni þess að Elísabet II Bretadrottning hefur setið að völdum í sjötíu ár. Fulltrúar konungsfjölskyldunnar hyggjast því heimsækja þá hluta samveldisins sem eru utan Bretlandseyja.