Athugið þessi frétt er meira en 5 mánaða gömul.

Segir ekki tímabært að afnema einangrun

Mynd með færslu
 Mynd: RÚV
Heilbrigðisráðherra segir stöðuna í kórónuveirufaraldrinum mjög viðkvæma, enda útbreiðsla smita mikil. Hann villl fara varlega í afléttingar, en ítrekaði á Alþingi í morgun að blessunarlega hafi þeim fækkað sem veikist illa. Nýjar tillögur eru boðaðar á morgun og hefur Þórólfur Guðnason sóttvarnalæknir skilað Willum Þór Þórssyni minnisblaði um næsta skref afléttinga.

Guðmundur Ingi Kristinsson, þingflokksformaður Flokks fólksins, spurði heilbrigðisráðherra í óundirbúnum fyrirspurnum í morgun hvort það væri rétt að reglur um sóttkví og einangrun yrðu felldar úr gildi á morgun. Willum Þór svaraði því til að í ljósi mikillar útbreiðslu með tilheyrandi vandkvæðum á heilbrigðisstofnunum sé það hans mat að ekki sé tímabært að breyta reglum um einangrun svo skömmu eftir síðustu breytingu. Reglum um einangrun var breytt á mánudag þar sem einangrun var stytt úr sjö dögum í fimm.

Heilbrigðisráðherra bætti því jafnframt við að hans mat væri líka að halda í grímur og halda fjarlægð á meðan farið væri í afléttingar. 

Orð ráðherra ríma við það sem sóttvarnalæknir sagði við fréttastofu í morgun. Hann skilaði ráðherra minnisblaði í morgun, og staðfesti í samtali við fréttastofu að meðal tillagna hans nú væri ekki að afnema reglur um einangrun. Sú hugmynd var uppi í öðru skrefi afléttingaáætlunar stjórnvalda. Til stóð að taka annað skrefið 24. febrúar, en Willum Þór boðaði fyrr í vikunni að afléttingarnar á morgun verði byggðar á því.