Mynd: Anton Brink - Ruv.is
Athugið þessi frétt er meira en 4 mánaða gömul.
Jóhannes Tryggvi sakfelldur í annað sinn
Héraðsdómur Reykjaness sakfelldi í hádeginu Jóhannes Tryggva Sveinbjörnsson fyrir kynferðisbrot gegn konu á nuddstofu sinni fyrir um áratug. Honum var gerður 12 mánaða hegningarauki sem bætist við það 6 ára fangelsi sem Landsréttur dæmdi hann í fyrir kynferðisbrot gegn fjórum konum í byrjun síðasta árs.
Þetta staðfestir Dagmar Ösp Vésteinsdóttir, saksóknari í málinu, við fréttastofu. Steinbergur Finnbogason, verjandi Jóhannesar, lýsti því strax yfir að dómnum yrði áfrýjað til Landsréttar.
Konan var er ein af ellefu sem kærði Jóhannes til lögreglunnar á höfuðborgarsvæðinu fyrir þremur árum en héraðssaksóknari ákvað að gefa ekki út ákæru á sínum tíma.
Hún kærði þá ákvörðun til ríkissaksóknara sem lagði fyrir lögreglu að rannsaka málið að nýju. Héraðssaksóknari gaf síðan út ákæru í maí.
Réttarhaldið í málinu var opið sem er einsdæmi þegar kynferðisbrot eru annars vegar. Konan sagði í skýrslutöku sinni að hún hefði talið að hún væri í höndum sérfræðings þegar hún leitaði til hans. „Ég trúði því að ég væri að fá aðstoð fagaðila við meiðslum í bakinu.“
Jóhannes nýtti rétt sinn til að tjá sig ekki um sakarefnið í réttarhaldinu en lýsti því yfir að hann hefði ekki komið við brjóst eða kynfæri konunnar á óviðeigandi hátt.
