Athugið þessi frétt er meira en 4 mánaða gömul.

Gripinn undir áhrifum og sýktur undir stýri

26.01.2022 - 07:31
Mynd með færslu
 Mynd: Ragnar Santos - RÚV
Sex ökumenn voru stöðvaðir fyrir akstur undir áhrifum áfengis eða fíkniefna á höfuðborgarsvæðinu í gærkvöldi og í nótt.

Einn þeirra var stöðvaður í Hlíðunum í Reykjavík skömmu eftir miðnætti, en sá er grunaður um akstur undir áhrifum fíkniefna og ítrekaðan akstur án ökuréttinda. Í þokkabót reyndist ökumaðurinn hafa greinst smitaður af Covid og hefði með réttu átt að vera í einangrun. Farþegi í bílnum var hvorki skráður í einangrun né sóttkví.

Á þriðja tímanum var ökumaður stöðvaður eftir hraðamælingu á Vesturlandsvegi. Sá er grunaður um akstur undir áhrifum fíkniefna og vörslu eða sölu þeirra.

Af öðrum verkefnum næturinnar má nefna að tilkynnt var um þjófnað úr verslun í miðborg Reykjavíkur. Þar hafði maður stolið búnti af pokum, að verðmæti 680 króna.

alexandergk's picture
Alexander Kristjánsson
Fréttastofa RÚV