Sendinefnd talibana gengur frá borði einkaþotunnar sem flutti þá til Oslóar Mynd: EPA-EFE - NTB
Athugið þessi frétt er meira en 4 mánaða gömul.
Talibanar komnir til Oslóar
Þota sem flutti sendinefnd háttsettra talibana frá Afganistan til Oslóar lenti á Gardemoen flugvelli í gærkvöld. Amir Khan Muttaqi, utanríkisráðherra fer fyrir nefndinni, sem flaug til Oslóar í boði norsku ríkisstjórnarinnar. Norska stjórnin vonast eftir að geta lagt sitt af mörkum til að draga úr neyð almennings í Afganistan, þar sem vetrarkuldi, eldsneytis-, lyfja- og matarskortur þjakar þorra landsmanna.
Til stendur að sendinefndin ræði við fulltrúa norskra, bandarískra og evrópskra stjórnvalda á Soría Moría hótelinu við Holmenkollen í dag og næstu daga, og að fjárhags- og neyðaraðstoð verði í brennidepli. Þá hyggjast hinir afgönsku gestir einnig hitta landa sína í Noregi að máli.
Áður eftirlýstur hryðjuverkamaður í sendinefndinni
Fimmtán manns eru í sendinefndinni, auk utanríkisráðherrans Muttaqi. Þeirra á meðal er Anas Haqqani, sem til skamms tíma var á lista Bandaríkjastjórnar yfir hryðjuverkamenn en var nýlega fjarlægður af honum og á sæti í forystusveit stjórnmálaarms talibana í Doha í Katar.
Eldri bróðir hans er Sirajuddin Haqqani, leiðtogi Haqqani-hreyfingarinnar og einn illræmdasti hryðjuverkamaður heims um langt skeið og núverandi varnarmálaráðherra og varaforsætisráðherra Afganistans. Hann er eftirlýstur víða um heim og bandarísk stjórnvöld leggja 10 milljónir Bandaríkjadala til höfuðs honum.
Haqqani-hreyfingin vann náið með al Kaída og Osama bin Laden á sínum tíma og síðar talibönum. Eru meðlimir hennar taldir hafa framið mörg af mannskæðustu hryðjuverkum sem framin hafa verið í Afganistan á síðustu 20 árum.
