Athugið þessi frétt er meira en 4 mánaða gömul.

„Eitthvað það stórkostlegasta sem ég hef upplifað“

Mynd: EPA / RÚV

„Eitthvað það stórkostlegasta sem ég hef upplifað“

22.01.2022 - 19:01
Guðmundur Guðmundsson landsliðsþjálfari Íslands í handbolta skorti nánast orð til að lýsa frammistöðu íslenska liðsins eftir 29-21 sigur gegn Ólympíumeisturum Frakka á EM í handbolta í Búdapest.

Sigurinn var Guðmundi augljóslega gríðarlega þýðingarmikill og þá sérstaklega í ljósi þess sem á undan hefur gengið. Guðmundur segir þetta eitt af því magnaðara sem hann hefur upplifað á sínum ferli.

„Karakterinn í liðinu, mér þætti gaman að sjá ykkur koma hérna, þegar það vantar 8 lykilmenn inn í þetta. Þetta er eitthvað það stórkostlegasta sem ég hef upplifað,“ sagði Guðmundur í samtali við RÚV eftir sigurinn.

„Við spiluðum ótrúlega skynsamlega, við gáfum okkur tíma í hverja sókn og þeir réðu hreinlega ekki við okkur. Markvarslan var í heimsklassa.“