Banaslys er gangandi vegfarandi varð fyrir strætisvagni

25.11.2021 - 22:04
Mynd með færslu
 Mynd: Eggert Þór Jónsson - RÚV
Kona sem lést í umferðarslysi á gatnamótum Gnoðarvogs og Skeiðarvogs í Reykjavík á níunda tímanum í morgun varð fyrir strætó. Hún var gangandi. Rauði krossinn veitti farþegum og bílstjóra áfallahjálp. 

Fyrst var greint frá þessu á mbl.is. 

Í svari Strætó við fyrirspurn fréttastofu segir að ef einhverjir, sem voru á vettvangi og hafi ekki sótt sér áfallahjálp í dag, en telji sig þurfa hana, er þeim bent á að leita til Rauða krossins. Starfsmenn Strætó séu harmi slegnir og að hugur þeirra sé hjá aðstandendum konunnar.  

Lögreglan á höfuðborgarsvæðinu og Rannsóknarnefnd samgönguslysa rannsaka tildrög slyssins, að því er fram kom í tilkynningu lögreglu í dag.