Athugið þessi frétt er meira en 2 mánaða gömul.

Ekki ástæða til rýmingar á Seyðisfirði

Mynd með færslu
 Mynd: Veðurstofa Íslands - RÚV
Almannavarnir telja ekki ástæðu til að rýma hús á Seyðisfirði þrátt fyrir að búist sé við talsverðri úrkomu á Austfjörðum næstu daga.

Almannavarnir funduðu með Veðurstofu og fulltrúum sveitarfélagsins Múlaþings í dag. Gefin var út úrkomu og skriðuviðvörun á sunnanverðum Austfjörðum. Vindaspá gerir ráð fyrir suðaustan og austanátt 8-12 metrum á sekúndu. Þessi vindátt skapar úrkomuskugga á Seyðisfirði. Því er ekki talin ástæða til rýmingar húsa. Gjarnan er talað um úrkomuskugga þegar fjallgarður skýlir svæði fyrir úrkomu. 

Hryggurinn milli skriðusársins og Búðarár er enn á hreyfingu þó hægt hafi á henni. Einn spegill  sýnir að stykkið sem hann stendur á hafi hrokkið til um 15-20 mm í gærkvöldi en sú hreyfing hefur ekki náð til annarra spegla á svæðinu.

Úrkoma næstu daga kann að verða til þess að einhver hluti hryggsins fari af stað. Sem fyrr er ekki gert ráð fyrir að hann fari allur í einu sökum þess hversu sprunginn hann er og gliðnaður. Útreikningar sýna að allar líkur eru á að varnargarðar og safnþró leiði efnið til sjávar og án þess að valda tjóni á mannvirkjum, jafnvel þó hryggurinn fari allur í einu.

Vel er fylgst með mælum í hlíðum ofan Seyðisfjarðar og viðeigandi ráðstafanir gerðar þyki ástæða til. Engar hreyfingar hafa mælst í hlíðum ofan Seyðisfjarðar utan þeirrar er mælst hefur í hryggnum. Óvissustig er enn í gildi vegna hættu á skriðuföllum.