Vilja að leyfi til eldis í sjó verði afturkölluð

Mynd með færslu
 Mynd: RÚV
Landssamband Veiðifélaga vill að rekstrarleyfi fiskeldis í sjó verði afturkölluð eða ógild eftir að Skipulagsstofnun komst að þeirri niðurstöðu að mat á lífrænum áhrifum sjókvíaeldis skuli háð ákvæðum laga um umhverfsimat.

Það var Landssamband Veiðifélaga (LV) sem óskaði eftir áliti Skipulagsstofnunar. Burðarþolsmat eru unnið af Hafrannsóknarstofnun, meðal annars til að meta óæskileg áhrif af eldisstarfsemi. Er þeim ætlað að meta hversu miklu lífrænu álagi fjörður, eða afmarkað hafsvæði, getur tekið á móti án þess að það hafi óæskileg áhrif á lífríkið.

Bæði sjávarútvegsráðuneytið og Samtök fyrirtækja í sjávarútvegi sendu inn umsögn í tengslum við álitsgerðina þar sem þau andmæltu því að burðarþolsmat væri háð umhverfismati.

Skipulagsstofnun tók hins vegar undir sjónarmið Landssambands veiðifélaga um að burðarþolsmat væri háð ákvæðum laga um umhverfismat. Fer sambandið fram á að stjórnvöld afturkalli útgefin rekstrarleyfi til sjókvíaeldis þar til framkvæmt hafi verið burðarþolsmat í samræmi við lög.

„Þetta burðarþolsmat hefur samkvæmt okkar skilningi hefur alltaf átt að fara í umhverfismat. Þetta er sá skilningur sem Skipulagsstofnun staðfesti í dag. Og eftir stendur að við sitjum uppi með þessi rekstrarleyfi sem hafa verið gefin út í trássi við gildandi lög og þá hlýtur eðlileg krafa að vera sú að þau séu afturkölluð eða ógild að minnsta kosti þar til bætt hefur verið úr þessum annmörkum,“ segir Gunnar Örn Petersen, framkvæmdastjóri LV.  

Gunnar Örn segir niðurstöðuna enn eitt dæmið um að stjórnvöld láti aldrei náttúruna njóta vafans. „Það sem okkur finnst kannski alvarlegast við þetta mál allt saman að þetta er enn eitt dæmið um óvönduð vinnubrögð stjórnvalda þar sem mál eru unnin mjög hratt og illa og í rauninni mjög sérstakt að lög sem hafa umhverfisvernd og sjálfbærni að markmiði, að það sé bara skautað framhjá þeim.“

Magnús Geir Eyjólfsson