Athugið þessi frétt er meira en 1 mánaða gömul.

Kærir kosningar í NV-kjördæmi og vill kjósa aftur

27.09.2021 - 11:23
Mynd með færslu
 Mynd: Hjalti Haraldsson - RÚV
Magnús Davíð Norðdahl, oddviti Pírata í Norðvesturkjördæmi, hefur ákveðið að kæra kosningarnar í Norðvesturkjördæmi til kjörbréfanefndar Alþingis og fara fram á svokallaða uppkosningu sem felur í sér að kosið yrði að nýju í Norðvesturkjördæmi. Kæran verður lögð fram formlega á næstu dögum. Eftir atvikum verður kæra einnig send til lögreglu.

Karl Gauti Hjaltason, frambjóðandi Miðflokksins, sem var einn þeirra fimm jöfnunarþingmanna sem datt út af þingi eftir að atkvæðin voru talin aftur, hefur einnig kært kosningarnar í kjördæminu. Kollegi hans, Bergþór Ólason, kom inn sem fulltrúi Miðflokksins í hans stað. 

Magnús telur ljóst að alvarlegir ágallar hafi verið á talningu atkvæða í Norðvesturkjördæmi. Kjörgögn hafi ekki verið innsigluð eftir lok talningar snemma morguns 26. september heldur skilin eftir á Hótel Borgarnesi í sal hótelsins þegar talningafólk fór heim.

„Varsla og eftirlit á þeim tíma, sem leið frá lokum talningar og fram að endurtalningu, þegar starfsfólk mætti aftur liggur ekki fyrir með fullnægjandi hætti,“ segir Magnús. Hótelið hafi verið opið og gestir verið þar þegar endurtalning fór fram. „Hafi salnum verið læst var hann ekki innsiglaður og þá liggur ekki fyrir hver eða hverjir höfðu lykla að umræddum sal,“ segir hann. 

Magnús gagnrýnir sérstaklega að endurtalning hafi hafist án þess að umboðsmönnum lista Pírata í Norðvesturkjördæmi væri gert viðvart. Formaður kjörstjórnar hafi síðan ekki orðið við kröfu umboðsmanna að bíða með endurtalningu þar til umboðsmenn kæmu á staðinn. Hann telur þetta til þess fallið að draga úr trúverðugleika talningarinnar, sama hvort litið er til fyrri eða síðari talningarinnar, starfa yfirkjörstjórnar í heild og þar með trúverðugleika kosninganna sem fram fóru í kjördæminu.

„Ljóst er að breyting varð á fjölda ógildra og auðra seðla á milli fyrri og síðari talningar og sama á við um atkvæðafjölda einstakra framboða. Svona vinnubrögð í lýðræðislegu ferli kosninga og talningar eru algjörlega óásættanleg,“ segir Magnús. 

Hann telur að endurtaka þurfi kosningarnar í Norðvesturkjördæmi, það sé eina leiðin til að skera úr um úrslitin, tryggja gagnsæi og að farið sé eftir lögum og reglum.