Athugið þessi frétt er meira en 1 mánaða gömul.

Grímseyjarkirkja brann til grunna

22.09.2021 - 02:18
Mynd með færslu
 Mynd: Sigurður Henningsson - RÚV
Grímseyjarkirkja brann til grunna í nótt. Mikill eldur kom upp í kirkjunni laust fyrir miðnætti, og var engum verðmætum hægt að bjarga úr kirkjunni, að sögn mbl.is sem greindi fyrst frá eldsvoðanum.

Mbl.is hefur eftir lögreglu að ekkert sé vitað um upptök eldsins og lögreglu sé ekki kunnugt um að neinn hafi verið í kirkjunni þegar útkall barst. 

Kirkjan var reist árið 1867. Hún var færð um lengd sína vegna eldhættu árið 1932, og var um leið byggður við hana kór og forkirkja með turni, segir á vefnum gardur.is. Gagngerar endurbætur voru gerðar á henni árið 1956 og var hún þá endurvígð.

Róbert Jóhannsson
Fréttastofa RÚV