Athugið þessi frétt er meira en 3 mánaða gömul.

Hlaup hafið í Vestari-Jökulsá

Mynd með færslu
 Mynd: Skagafjörður
Hlaup er hafið í Vestari-Jökulsá í Skagafirði en upptakakvíslar hennar koma undan Hofsjökli norðanverðum.

Frá þessu er greint á Facebook-síðu lögreglunnar á Norðurlandi Vestra.

Vestari-Jökulsá rennur saman við Austari-Jökulsá um 8 kílómetra sunnan við mynni Norðurárdals (á móts við Silfrastaði) og mynda þær saman Héraðsvötn. Þjóðvegur 1 milli Varmahlíðar og Akureyrar liggur með Héraðsvötnum á kafla.

Ekki er reiknað með hættu af hlaupinu en líklegt er að vaxi nokkuð í Héraðsvötnum og að þau litist af aurburði. Einhver brennisteinslykt getur fylgt hlaupinu og lögreglan beinir þeim tilmælum til fólks að það dvelji ekki við ána á meðan á hlaupinu stendur.

Jón Agnar Ólason