Athugið þessi frétt er meira en 2 mánaða gömul.

Óttast að Mjanmar verði næsti ofurdreifari veirunnar

epa09077552 Friends and relatives of Khant Nyar Hein, an eighteen-year-old medical student who was shot dead on a protest against the military coup, carry his coffin during a funeral service in Yangon, Myanmar, 16 March 2021. Khant Nyar Hein was killed during an anti-coup protest on 14 March. Anti-coup protests continue in Myanmar as global alarm grows over intensifying violent crackdowns on demonstrators by security forces  EPA-EFE/STRINGER
 Mynd: EPA-EFE - EPA
Erindreki Sameinuðu þjóðanna í Mjanmar varar við að landið geti orðið næsti ofurdreifari kórónuveirunnar. Heilbrigðiskerfið er í molum, dauðsföllum af völdum covid hefur fjölgað mjög og óttast er að ástandið muni versna enn á komandi mánuðum.

Í kjölfar valdaráns hersins í febrúar hefur heilbrigðiskerfi Mjanmar hrakað mjög og bólusetningaráætlanir brostið. Aðeins um þrjú prósent íbúanna eru bólusettir og dauðsföllum hefur fjölgað gífurlega frá því í júlíbyrjun. 

Þetta kemur fram í samantekt á vef norska ríkisútvarpsins. 

Þar er haft eftir The Guardian að líkbrennslur í landinu hafi vart undan þrátt fyrir að standa langar vaktir, daga og nætur. Nú er hlutfall andláta af völdum sjúkdómsins orðið hærra en á Indlandi í Mjanmar, Malasíu og Indónesíu.

Tom Andrews erindreki Sameinuðu þjóðanna í landinu segir mikla hættu á ferðum, Delta-afbrigðið og önnur bráðsmitandi fari um sem eldur í sinu. Hann minnir á að um þriðjungur jarðarbúa eigi heimkynni sín skammt frá Mjanmar og því geti veiran dreifst hratt um, meðal annars til Kína.

Andrews minnir á að veiran fari ekki í manngreinarálit, smiti og felli fólk í valinn, hvert sem þjóðerni þess, hugmyndafræði eða stjórnmálaskoðanir eru.

Óttast er að ástandið í Mjanmar muni versna enn á næstu vikum og mánuðum að því er fram kemur í máli mannréttindahóps á vegum ASEAN, samtaka ríkja í Suðaustur-Asíu.

Traust á herstjórninni sé ekkert, enda hafi hún beitt heilbrigðisstarfsfólk mikilli hörku. Afar fáir íbúar Mjanmar fari í skimun, fáir bólusettir, skortur sé á súrefni og lyfjum sem geri ástandið afar alvarlegt.