Athugið þessi frétt er meira en 2 mánaða gömul.

Löggjöf vegna COVID-19 mótmælt á Grikklandi og Ítalíu

Greek police use tear gas to disperse anti-vaccine protesters during a rally at Syntagma square, central Athens, on Wednesday, July 21, 2021. Thousands of people protested against Greek government's measures to curb rising COVID-19 infections and drive up vaccinations in the country where almost 50% of Greeks and country residents have received at least one dose of the vaccine. (AP Photo/Yorgos Karahalis)
 Mynd: AP
Takmörkunum og sóttvarnaaðgerðum vegna COVID-19 var mótmælt af hörku í hvorutveggja Grikklandi og Ítalíu í gær. Víðast hvar fóru mótmælin friðsamlega fram en í Aþenu greip lögregla þó til harkalegra aðgerða.

Beitti lögreglan bæði táragasi og háþrýstidælum til að dreifa mannfjöldanum þegar um fjögur þúsund manns söfnuðust saman utan við þinghúsið í miðborg Aþenu til að mótmæla lögum um skyldubólusetningu fólks í nokkrum starfsstéttum.

Táragas og háþrýstidælur gegn bólusetningarandstæðingum

Er þetta í þriðja sinn sem blásið er til mótmæla gegn lögunum. Þau kveða á um að allt starfsfólk í heilbrigðisþjónustu og umönnunarstörfum, jafnt hjá hinu opinbera sem í einkageiranum, skuli láta bólusetja sig áður en ágúst er úti en fara í ólaunað leyfi að öðrum kosti. Þetta á líka við um fólk í ýmsum störfum öðrum þar sem smithætta telst mikil.

Ítalir mótmæltu „græna passanum“

Á Ítalíu gengu tugir þúsunda um götur og torg helstu borga landsins og kyrjuðu slagorð á borð við „Frelsi!", „Niður með harðstjórnina!" og „Engan grænan passa!" Með hinu síðastnefnda er átt við skírteini fyrir fólk sem er ýmist fullbólusett, búið að ná sér af COVID-19 sýkingu eða með nýtt, neikvætt COVID-19 próf upp á vasann.

Frá og með 6. ágúst veitir græni passinn handhöfum hans mun meira frelsi til athafna en hinum, sem óbólusett eru. Munar þar mestu um heimild til að njóta veitinga og skemmtana og afþreyingar innan um annað fólk innanhúss; á veitingahúsum, kvikmyndahúsum, söfnum, sundlaugum og svo má áfram telja.

Mótmæli í Frakklandi og Ástralíu

Í Frakklandi kom líka til átaka lögreglu og mótmælenda í gær. Þar, rétt eins og á Ítalíu, mótmælti fólk áformum um að framvísa þurfi vottorði um bólusetningu eða neikvætt COVID-próf á opinberum stöðu á borð við veitingastaði og kvikmyndahús.

Og í Sydney í Ástralíu sló einnig í brýnu milli lögreglu og borgarbúa sem hafa fengið sig fullsadda af útgöngubanninu sem þar hefur verið í gildi vikum saman vegna mikillar útbreiðslu delta-afbrigðis kórónaveirunnar þar í borg.